گورنر راج:مسلم لیگ ن کی خوازہ خیلہ میں ریلی، پی ٹی آئی حکومت کے خاتمے پر یومِ نجات منایا گیا

سوات (بیورو رپورٹ) سوات کی تحصیل خوازہ خیلہ میں پاکستان مسلم لیگ ن کی جانب سے گورنر راج اور ایمرجنسی کے حق میں ریلی نکالی گئی، جس میں پارٹی کارکنوں نے خیبر پختونخوا میں پی ٹی آئی حکومت کے خاتمے پر یومِ نجات منایا۔ ریلی کی قیادت مسلم لیگ ن سوات کے ضلعی صدر قیموس خان اور دیگر مقامی رہنماؤں نے کی۔ ریلی میں شریک کارکنوں نے قومی پرچم اور مسلم لیگ ن کے جھنڈے اٹھا رکھے تھے اور نواز شریف کے حق میں نعرے بازی کی۔ اس موقع پر خطاب کرتے ہوئے قیموس خان اور دیگر رہنماؤں نے کہا کہ آج نجات کا دن ہے اور عوام کو نااہل حکمرانوں سے چھٹکارا ملا ہے۔ انہوں نے گورنر راج اور ایمرجنسی کے نفاذ کی حمایت کرتے ہوئے اسے صوبے کی موجودہ صورت حال میں اہم اقدام قرار دیا۔ ریلی میں شریک کارکنوں نے پارٹی قیادت کے حق میں نعرے لگائے اور اپنے سیاسی مؤقف کا اظہار کیا۔