اسلام آباد۔4ستمبر (اے بی سی):حکومت نے بلوچستان اور پنجاب کی حکومتوں کے تعاون سے فوڈ ایگ 2027 کے تحت خصوصی اقدامات کے ذریعے پاکستان کے باغبانی کے شعبے کو فروغ دینے اور ترقی دینے کا منصوبہ بنایا ہے۔ویلتھ پاکستان کو دستیاب سرکاری دستاویزات کے مطابق فوڈ ایگ 2027 کے لئے صوبائی حکومتوں کے ساتھ شراکت داری کا منصوبہ بنایا گیا ہے جس کے تحت باغبانی کے شعبے کے فروغ اور ترقی پر توجہ مرکوز کرتے ہوئے خصوصی تقریبات اور اقدامات کئے جائیں گے۔یہ اقدام ٹریڈ ڈویلپمنٹ اتھارٹی آف پاکستان (ٹی ڈی اے پی) کی جانب سے تجارتی سہولت کاری اور برآمدات کے فروغ کی خدمات کو مضبوط بنانے کے لئے کئے جانے والے خصوصی اقدامات کے سلسلے کا حصہ ہے۔
دستاویزات کے مطابق پاکستان بھر کے 12 بڑے چیمبرز آف کامرس میں ہیلپ ڈیسک قائم کئے گئے ہیں۔اس کے علاوہ جنوبی بلوچستان میں تجارتی سہولت کاری اور برآمدات کے فروغ کی خدمات کو مضبوط بنانے کے لئے حب میں لسبیلہ چیمبر آف کامرس اینڈ انڈسٹری (ایل سی سی آئی) میں ٹی ڈی اے پی کا دفتر اور ہیلپ ڈیسک بھی قائم کیا گیا ہے۔
ٹی ڈی اے پی ڈیجیٹلائزیشن کے ذریعے تجارتی سہولت کاری کے لئے بھی اقدامات کر رہا ہے۔ ان اقدامات میں سرٹیفکیٹس آف اوریجن (سی او او) کا آن لائن اجرا، ٹی ڈی اے پی ٹریڈ پورٹل کے پہلے مرحلے کی تکمیل اور پریفرینشل ٹریڈ ایکسس ڈیٹا بیس (پی ٹی اے ڈی) شامل ہیں۔دستاویزات میں درج دیگر اقدامات میں ای کامرس کے لئے گلوب سمٹ اور آئی ٹی سٹارٹ اپس کے فروغ کے لئے پی آئی ایکس ایس شامل ہیں۔
دستاویزات کے مطابق برآمد کنندگان کی استعداد کار بڑھانے کے لئے ایگزم بینک اور پاکستان سنگل ونڈو (پی ایس ڈبلیو) کے ساتھ مفاہمتی یادداشتوں پر بھی کام کیا جا رہا ہے۔صوبائی شراکت داری کے منصوبے کے تحت ٹی ڈی اے پی فوڈ ایگ 2027 کے لئے بلوچستان اور پنجاب کی حکومتوں کے ساتھ تعاون کرے گا جس میں خصوصی تقریبات اور اقدامات کے ذریعے خاص طور پر باغبانی کے شعبے کے فروغ اور ترقی پر توجہ دی جائے گی۔