سوات: پی ٹی آئی حکومت کے خاتمے پر مسلم لیگ ن کا نشاط چوک مینگورہ میں جشن، مٹھائیاں تقسیم کی گئیں

سوات (بیورو رپورٹ) خیبرپختونخوا میں پاکستان تحریک انصاف کی حکومت کے خاتمے پر پاکستان مسلم لیگ ن کے کارکنوں نے نشاط چوک مینگورہ میں جشن منایا، اس موقع پر کارکنوں میں خوشی کی لہر دوڑ گئی اور مٹھائیاں تقسیم کرکے اپنی خوشی کا اظہار کیا گیا، مسلم لیگ ن کے کارکنوں نے پارٹی پرچم اٹھا رکھے تھے اور پاکستان زندہ باد، نواز شریف زندہ باد کے نعرے لگاتے رہے، اس موقع پر پاکستان مسلم لیگ نون ملاکنڈ ڈویژن کے صدر واجد علی خان،مسلم لیگ نون یوتھ ونگ خیبر پختونخوا کے جنرل سیکرٹری ارشاد علی خان،نورخان،فرہاد علی خان، احمد شاہ اور دیگر پارٹی رہنماؤں اور کارکنوں نے شرکت کی، نشاط چوک میں اجتماع سے خطاب کرتے ہوئے مسلم لیگ ن کے رہنماؤں نے کہا کہ ان کے نزدیک خیبرپختونخوا میں نااہل اور کرپٹ حکومت کا خاتمہ ہوگیا ہے اور اب صوبے میں امن و امان کی بہتری، خوشحالی اور ترقی کا نیا دور شروع ہوگا، انہوں نے امید ظاہر کی کہ صوبے میں عوامی مسائل کے حل، ترقیاتی منصوبوں کی تکمیل اور عوام کو ریلیف فراہم کرنے پر توجہ دی جائے گی، مقررین نے کہا کہ خیبرپختونخوا کے عوام طویل عرصے سے امن، استحکام اور ترقی کے خواہاں ہیں اور انہیں توقع ہے کہ آنے والے وقت میں صوبے میں ترقیاتی سرگرمیوں کو فروغ ملے گا، اس موقع پر کارکنوں نے اپنی قیادت کے حق میں نعرے لگائے اور حکومت کی تبدیلی کو اپنی سیاسی جدوجہد کی کامیابی قرار دیتے ہوئے خوشی کا اظہار کیا۔