یونیورسٹی آف سوات میں انتظامی اور مالی امور کا جائزہ، شفافیت اور کفایت شعاری یقینی بنانے کی ہدایت

سوات (بیوروپورٹ) یونیورسٹی آف سوات میں وائس چانسلر پروفیسر ڈاکٹر حسن الامین کی زیر صدارت ایک اعلیٰ سطحی اجلاس منعقد ہوا، جس میں رجسٹرار ڈاکٹر ارشد علی خان اور ڈائریکٹر فنانس محبوب الرحمان نے اپنے اپنے شعبوں کی کارکردگی، جاری امور اور درپیش چیلنجز کے حوالے سے تفصیلی بریفنگ دی۔ رجسٹرار ڈاکٹر ارشد علی خان نے وائس چانسلر کو تعلیمی اور انتظامی معاملات سے آگاہ کرتے ہوئے بتایا کہ یونیورسٹی میں تدریسی و انتظامی امور مروجہ قواعد و ضوابط کے مطابق مکمل شفافیت اور میرٹ کی بنیاد پر چلائے جا رہے ہیں، جبکہ سنڈیکیٹ، اکیڈمک کونسل اور دیگر قانونی فورمز کے فیصلوں پر عمل درآمد میں ہونے والی پیش رفت سے بھی آگاہ کیا گیا۔ انہوں نے بتایا کہ طلبہ کو بروقت سہولیات کی فراہمی کے لیے داخلوں، امتحانات اور ڈگریوں کے اجرا کے عمل کو مزید ڈیجیٹلائز کیا جا رہا ہے۔ ڈائریکٹر فنانس محبوب الرحمان نے یونیورسٹی کی مالی صورت حال، بجٹ، آمدن اور اخراجات پر تفصیلی بریفنگ دیتے ہوئے کہا کہ تمام مالی امور ہائر ایجوکیشن کمیشن اور حکومتی معیاری طریقہ کار کے مطابق چلائے جا رہے ہیں، جبکہ جاری ترقیاتی منصوبوں، تنخواہوں، پنشن اور طلبہ کے وظائف کے لیے مختص فنڈز کے استعمال پر بھی روشنی ڈالی۔ اس موقع پر وائس چانسلر پروفیسر ڈاکٹر حسن الامین نے دونوں شعبوں کی کارکردگی کو سراہتے ہوئے ہدایت کی کہ انتظامی اور مالی معاملات میں شفافیت، کفایت شعاری اور جدید تقاضوں سے ہم آہنگی کو مزید یقینی بنایا جائے۔ انہوں نے کہا کہ یونیورسٹی کی ترقی کا انحصار مضبوط انتظامی اور مالی ڈھانچے پر ہے اور طلبہ کی فلاح و بہبود اور تعلیم کے معیار میں بہتری کے لیے تمام دستیاب وسائل بروئے کار لائے جائیں گے۔