آر پی او ملاکنڈ کا ڈی پی او آفس سوات کا دورہ، سی سی ٹی وی نگرانی مزید مؤثر بنانے کی ہدایت

سوات (بیورو رپورٹ) نوتعینات ریجنل پولیس آفیسر ملاکنڈ زاہد نواز مروت نے ڈی پی او آفس سوات کا دورہ کیا، جہاں ڈی پی او سوات محمد عمر خان نے ان کا پرتپاک استقبال کیا۔ اس موقع پر آر پی او ملاکنڈ نے ڈی پی او آفس میں قائم جدید کمانڈ اینڈ کنٹرول سنٹر کا تفصیلی جائزہ لیا اور عوامی سہولت کے لیے متعارف کردہ جدید سافٹ ویئرز کا معائنہ کیا۔ انہوں نے مختلف ڈیسکوں پر تعینات پولیس اہلکاروں سے سافٹ ویئرز کے استعمال، کارکردگی اور افادیت کے حوالے سے تفصیلی بریفنگ بھی لی۔ آر پی او ملاکنڈ نے کنٹرول سنٹر میں نصب مانیٹرنگ اسکرینز کے ذریعے ضلع سوات کے داخلی و خارجی چیک پوسٹوں، مینگورہ بازار اور مختلف شاہراہوں پر نصب سی سی ٹی وی کیمروں کی نگرانی کے نظام کا جائزہ لیا۔ انہوں نے ہدایت کی کہ داخلی و خارجی راستوں اور بازاروں میں اسٹریٹ کرائم کی روک تھام کے لیے کیمروں کے ذریعے سیکیورٹی کی مؤثر نگرانی یقینی بنائی جائے اور جرائم کی بروقت روک تھام کے لیے سی سی ٹی وی کیمروں کی تعداد میں مزید اضافہ کیا جائے۔ انہوں نے کہا کہ کمانڈ اینڈ کنٹرول سنٹر کے قیام کا بنیادی مقصد عوام کو خیبر پختونخوا پولیس کی جدید ٹیکنالوجی سے مستفید کرنا ہے، جبکہ اس نظام کو مزید بہتر بنا کر شہریوں کو زیادہ مؤثر سہولیات فراہم کی جائیں گی۔