سوات چیمبر آف کامرس کے پہلے ایگزیکٹیو کمیٹی اجلاس ، بشام دھرنے میں بھرپور شرکت کا اعلان

سوات (بیورو رپورٹ) سوات چیمبر آف کامرس اینڈ انڈسٹری کی نومنتخب کابینہ کا پہلا باضابطہ ایگزیکٹیو کمیٹی اجلاس صدر یوسف علی خان کی زیر صدارت منعقد ہوا، جس میں کاروباری برادری کی نمائندگی، تاجروں کو درپیش مسائل اور بشام میں ہونے والے احتجاجی دھرنے سمیت اہم امور پر تفصیلی تبادلہ خیال کیا گیا۔ اجلاس میں سینئر نائب صدر یونس خان، حاجی حمید الرحمان، سابق صدر نور محمد خان، ایگزیکٹیو کمیٹی کے اراکین اور خواتین ممبران نے شرکت کی۔ اجلاس میں فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) میں سوات چیمبر کی نمائندگی کے لیے علی محمد خان اور خورشید انور خان کو امیدوار نامزد کرنے کی منظوری دی گئی۔ تمام ایگزیکٹیو ممبران نے نامزدگیوں کی حمایت کی، جبکہ ووٹنگ کے ذریعے فیصلے کی توثیق بھی کی گئی۔ اجلاس میں بدھ کے روز بشام کے مقام پر تاجر ایکشن کمیٹی کے احتجاجی دھرنے کے حوالے سے بھی تفصیلی گفتگو ہوئی۔ ایگزیکٹیو کمیٹی نے سوات ٹریڈ فیڈریشن اور سوات ایکشن کمیٹی کے ساتھ مکمل یکجہتی کا اظہار کرتے ہوئے دھرنے کی بھرپور حمایت کا اعلان کیا۔ اجلاس میں فیصلہ کیا گیا کہ سوات چیمبر آف کامرس اینڈ انڈسٹری کے ایگزیکٹیو ممبران، صنعت کاروں اور فیکٹریوں میں کام کرنے والے مزدوروں کی بڑی تعداد احتجاجی دھرنے میں شرکت کرے گی۔
۔۔۔۔۔۔