اضافی ویکسینیشن پالیسی: سعودی عرب جانے والے عمرہ زائرین شدید مشکلات سے دوچار

ٹریولز اینڈ ٹورز ایجنٹ ایسوسی ایشن تیمرگرہ کی ہنگامی میڈیا ٹاک، حکومت سے فوری نوٹس لینے کا مطالبہ

تیمرگرہ (اسماعیل انجم سے) اضافی ویکسینیشن کی اچانک عائد کردہ پالیسی کے باعث سعودی عرب جانے والے عمرہ زائرین اور ٹریول آپریٹرز کو شدید سفری و تکنیکی مشکلات کا سامنا کرنا پڑ رہا ہے۔ اس تشویشناک صورتحال پر ٹریولز اینڈ ٹورز ایجنٹ ایسوسی ایشن تیمرگرہ کے چیئرمین امیر اعظم تاجک نے جنرل سیکرٹری عباد شاہین کے ہمراہ ہنگامی میڈیا ٹاک کی، جس میں انہوں نے حکومت اور وزارتِ مذہبی امور سے فوری مداخلت کی اپیل کی۔
میڈیا سے گفتگو کرتے ہوئے امیر اعظم تاجک اور عباد شاہین نے کہا کہ نئی ویکسینیشن شرط اور اس کی بروقت دستیابی نہ ہونے کے سبب زائرین کے ویزے اور ٹکٹس ضائع ہونے کا اندیشہ پیدا ہو چکا ہے، جبکہ مقدس سفر پر روانہ ہونے والے شہری سخت ذہنی اور مالی اضطراب میں مبتلا ہیں۔ دوسری جانب سفری انتظامات میں غیر یقینی صورتحال نے ٹریول ایجنٹس کے لیے بھی شدید مسائل کھڑے کر دیے ہیں۔
رہنماؤں نے مطالبہ کیا کہ حکومتِ پاکستان فوری طور پر سعودی حکام کے ساتھ اس معاملے کو سفارتی سطح پر اٹھائے اور زائرین کے لیے شرائط میں نرمی یا متبادل سہولیات کی فراہمی یقینی بنائے۔ انہوں نے خبردار کیا کہ اگر فوری نوٹس لے کر ریلیف فراہم نہ کیا گیا تو ہزاروں زائرین کا مقدس سفر متاثر ہونے کے ساتھ ساتھ بھاری مالی نقصان کا اندیشہ ہے۔