نالائق ٹولے کا اب احتساب ہوکر رہے گا، 13 سالہ تاریک دور عوام نے مسترد کردیا ،امیرمقام

سوات (بیورو رپورٹ) وفاقی وزیر امور کشمیر وگلگت بلتستان انجینئر امیر مقام نے مینگورہ کے نشاط چوک میں مسلم لیگ (ن) کے یوم تشکر جلسے سے خطاب کرتے ہوئے کہا ہے کہ سب سے پہلے اللہ تعالیٰ اور پھر عوام کا شکریہ ادا کرتا ہوں، پختونوں کے نام نہاد نمائندوں کی حیثیت معلوم ہوگئی ہے اور عوام نے ریفرنڈم کے ذریعے اس ٹولے کو مسترد کردیا ہے، اس ٹولے کا اب احتساب ہوکر رہے گا۔ انہوں نے کہا کہ خیبر پختونخوا کے عوام ان نااہل لوگوں کے جانے پر جشن منا رہے ہیں، لوگوں نے مٹھائیاں تقسیم کیں اور آج حب الوطنی کا مظاہرہ کرتے ہوئے وفاقی حکومت کے اقدامات کی توثیق کی ہے۔ ان کا کہنا تھا کہ مینگورہ کےجلسے میں ہزاروں لوگوں نے شرکت کرکے ریکارڈ توڑ دیا، جبکہ عوام نے 13 سالہ تاریک دور کو یکسرمسترد کردیا ہے۔ امیر مقام نے کہا کہ گورنر راج کے نفاذ پر احتجاج کی دھمکیاں دینے والوں کو عوام نے مسترد کردیا ہےاور ان کی دھمکیوں کے باوجود بھی یہاں کے عوام نے وفاقی حکومت کے فیصلے کی توثیق کردی ہے۔ انہوں نے کہاکہ پختون اور خیبر پختونخوا کسی کی جاگیر نہیں، پختون گولیوں سے ڈرنے والے نہیں اور آج ملک سے باہر بیٹھے لوگوں کو دکھانا چاہتا ہوں کہ پختونوں کا اصل لیڈر کون ہے؟ انہوں نے الزام عائد کیا کہ سابق صوبائی حکومت نے لوٹ مار کرکے صوبے کو کھنڈر بنادیا اور تین ماہ تک صوبے کو لاوارث چھوڑے رکھا، جبکہ صوبے میں روزانہ لاشیں اٹھائی جاتی رہیں اور امن کے قیام کے لیے کوئی مؤثر اقدامات نہیں کیے گئے۔ انہوں نے کہا کہ ہم نہیں چاہتے تھے کہ یہ اقدام اٹھایا جائے، ہماری خواہش تھی کہ عوامی مینڈیٹ کا احترام کیا جائے، تاہم دہشت گردی کے مسئلے پر مذاکرات کے باوجود وزیراعلیٰ خیبر پختونخوا ایک پیج پر آنے کو تیار نہیں تھے۔ امیر مقام کے مطابق ایمرجنسی کا نفاذ اور گورنر راج کا مقصد صوبے میں امن قائم کرنا ہے، کیونکہ معدنی وسائل کے مؤثر استعمال اور ترقی کے لیے بھی امن ضروری ہے۔ انہوں نے افواج پاکستان کو متنازع بنانے کی مخالفت کرتے ہوئے کہا کہ معرکۂ حق میں فوج نے ثابت کیا کہ وہ ملک کی حقیقی محافظ ہے، فوج کا مورال گرانا درست نہیں اور سیلاب و زلزلوں کے دوران اس کی خدمات اور امن کے لیے دی جانے والی قربانیاں کسی سے پوشیدہ نہیں۔ انہوں نے دعویٰ کیا کہ پی ٹی آئی سیاسی طور پر دفن ہوچکی ہے اور اسے دوبارہ اقتدار میں آنے کے خواب نہیں دیکھنے چاہییں۔ امیر مقام نے کہا کہ صوبے کے مسائل کا حل ان کے لیے ایک امتحان ہے اور انشاء اللہ عوام کی تائید سے ہم اس امتحان میں سرخرو ہوں گے اور عوام کی محرومیاں ختم کریں گے۔انجینئر امیرمقام نے اس موقع پر فیلڈ مارشل جنرل عاصم منیراور وزیراعظم شہباز شریف سے اپیل کی کہ پختونوں کو دل سے لگائیں، جبکہ وزیر اعلیٰ پنجاب مریم نواز سے آٹے کی ترسیل کے لیے قائم چیک پوسٹیں ختم کرنے کی درخواست کی۔ انہوں نے فاٹا اور پاٹا میں ٹیکسوں کے خاتمے کا مطالبہ کرتے ہوئے کہا کہ موجودہ حالات میں ٹیکس نافذ نہیں ہونے چاہییں اور اس ضمن میں ان کی کوششیں جاری ہیں۔ انہوں نے اس عزم کا بھی اعادہ کیا کہ اب صوبے میں خوشحالی اور ترقی کے ساتھ ساتھ نالائق اور کرپٹ ٹولے کا احتساب بھی ہوگا ۔اس موقع پر ڈویژنل صدر ملاکنڈ ڈویژن واجد علی خان، جنرل سیکرٹری محمد علی شاہ، ایم پی اے رشاد خان، قوی خان، قیموس خان ، ملک جہانگیر خان، ارشاد علی اور دیگر پارٹی رہنماؤں نے بھی خطاب کیا۔