ثمرباغ: کامبٹ میں گورنر راج کے حق میں اور سابق صوبائی حکومت کے خلاف یومِ نجات کے سلسلے میں مظاہرہ

جندول (لیاقت سیماب) تحصیل ثمرباغ کے علاقے کامبٹ میں گورنر راج کے حق میں اور سابقہ صوبائی حکومت کے خلاف یومِ نجات کے سلسلے میں احتجاجی واک کا انعقاد کیا گیا۔ واک کی قیادت سابق امیدوار پی کے 17 کفایت اللہ اور سابق تحصیل امیدوار قیصر شاہ نے کی، جس میں شرکاء نے اپنے مطالبات کا اظہار کیا۔

اس موقع پر سابق امیدوار پی کے 17 کفایت اللہ نے خطاب کرتے ہوئے کہا کہ ان کے نزدیک یہ گورنر راج نہیں بلکہ عوامی راج ہے، جس کے ذریعے عوام کو ریلیف ملنے کی امید ہے۔

سابق تحصیل امیدوار قیصر شاہ نے اپنے خطاب میں کہا کہ ان شاء اللہ گورنر راج کے دوران معدنیات کے وسائل عوام کے ہاتھوں میں ہوں گے اور عوام کو ان کے حقوق ملیں گے۔ انہوں نے مطالبہ کیا کہ سابقہ صوبائی حکومت کے دور میں مبینہ کرپشن کی شفاف تحقیقات کرائی جائیں اور ذمہ داروں کا تعین کیا جائے۔

مظاہرے کے شرکاء نے گورنر راج سے عوامی مسائل کے حل، معدنی وسائل پر عوامی حق اور سابقہ حکومت کے دور کے مالی معاملات کی تحقیقات کا مطالبہ کیا۔ مقررین نے امید ظاہر کی کہ حکومتی اقدامات سے علاقے کے عوام کو ریلیف ملے گا۔