ٹی ایچ کیو ہسپتال ثمرباغ آؤٹ سورسنگ کی فہرست سے خارج، عملے میں خوشی کی لہر
ایم ایس ڈاکٹر عادل کی سربراہی میں مٹھائی تقسیم، ہسپتال کو مزید سہولیات سے آراستہ کرنے کا عزم
جندول (لیاقت سیماب درانی) ٹی ایچ کیو ہسپتال ثمرباغ کو آؤٹ سورسنگ کی فہرست سے خارج کر دیا گیا، جس پر ہسپتال کے ڈاکٹرز، پیرامیڈیکل اسٹاف اور دیگر ملازمین نے خوشی کا اظہار کرتے ہوئے مٹھائیاں تقسیم کیں۔ اس فیصلے پر پورے جندول کے عوام میں بھی خوشی کی لہر دوڑ گئی۔
اس موقع پر ایم ایس ٹی ایچ کیو ہسپتال ثمرباغ ڈاکٹر عادل خان کی سربراہی میں ہسپتال کے مختلف شعبوں کے عملے نے مٹھائیاں تقسیم کیں۔ ایم ایس ڈاکٹر عادل خان نے کہا کہ ہسپتال کو آؤٹ سورسنگ سے بچانے کے لیے ایم پی اے عبیدالرحمن کی کوششیں قابلِ تحسین ہیں، جنہوں نے صوبائی اسمبلی سمیت متعلقہ فورمز پر یہ معاملہ مؤثر انداز میں اٹھایا اور حکام سے مسلسل رابطے کیے۔
پریس کانفرنس سے خطاب کرتے ہوئے ایم ایس ڈاکٹر عادل خان نے کہا کہ ہسپتال کی بہتری کے لیے تمام اسٹاف نے بھرپور تعاون کیا ہے، جس کے نتیجے میں گزشتہ دو سال کے دوران ہسپتال کی کارکردگی اور طبی سہولیات میں نمایاں بہتری آئی ہے۔ انہوں نے کہا کہ ہسپتال کو مزید فعال بنانے اور عوام کو زیادہ سے زیادہ طبی سہولیات مقامی سطح پر فراہم کرنے کے لیے کوششیں جاری رکھی جائیں گی۔
انہوں نے کہا کہ ایمرجنسی سروسز کے ساتھ جنرل سرجری، گائنی، آرتھوپیڈکس، میڈیسن اور بچوں کے علاج کی سہولیات کو مزید بہتر اور فعال بنایا جائے گا، جبکہ لیبارٹری، ایکسرے، ڈینٹل یونٹ اور دیگر تشخیصی سہولیات میں بھی مزید بہتری لائی جائے گی۔
ایم ایس ڈاکٹر عادل خان نے کہا کہ ہسپتال انتظامیہ کا مقصد ثمرباغ ہسپتال کو جندول کے عوام کے لیے ایک بہتر اور مؤثر طبی مرکز بنانا ہے اور اس مقصد کے حصول تک کوششیں جاری رہیں گی۔
اس موقع پر ہسپتال کے تمام اسٹاف، میڈیکل اسٹور ایسوسی ایشن اور دیگر متعلقہ افراد نے ایم پی اے عبیدالرحمن کا شکریہ ادا کرتے ہوئے کہا کہ ہسپتال کو آؤٹ سورسنگ کی فہرست سے خارج کرنا علاقے کے عوام کے لیے ایک اہم پیش رفت ہے۔
