سوات: بریکوٹ کٹیگری سی ہسپتال کا باقاعدہ افتتاح، 65 کروڑ روپے کی لاگت سے مکمل منصوبہ فعال

سوات (بیورورپورٹ) صوبائی وزیر ہاؤسنگ ڈاکٹر امجد علی نے 65 کروڑ روپے کی لاگت سے مکمل ہونے والے بریکوٹ کٹیگری سی ہسپتال کی نئی عمارت کا باقاعدہ افتتاح کردیا۔ ہسپتال میں ایمرجنسی، ایکسرے، لیبارٹری، آرتھوپیڈک، لیبر روم، ڈینٹل اور آئی سمیت مختلف اہم شعبہ جات فعال کردیئے گئے ہیں، جبکہ مریضوں کی بہتر دیکھ بھال کے لیے ضروری طبی و معاون عملہ بھی تعینات کردیا گیا ہے۔ہسپتال کی تکمیل سے بریکوٹ اور گردونواح کے ہزاروں افراد کو اپنے علاقے میں طبی سہولیات میسر آئیں گی اور علاج معالجے کے لیے دور دراز شہروں کا رخ کرنے کی ضرورت کم ہوگی۔ ایمرجنسی سروس، تشخیصی ٹیسٹ، زچگی، ہڈیوں و جوڑوں، آنکھوں اور دانتوں کے علاج سمیت مختلف بنیادی طبی سہولیات ایک ہی جگہ دستیاب ہوں گی۔65کروڑ روپے کا یہ منصوبہ بریکوٹ میں صحت کے بنیادی ڈھانچے کی بہتری کی جانب اہم پیش رفت قرار دیا جارہا ہے، جس سے علاقے کی موجودہ اور مستقبل کی طبی ضروریات پوری کرنے میں مدد ملے گی۔