ڈی۔پی۔او لوئر چترال محمد خالد خان کا وادی لٹکوہ کا دورہ، عمائدین علاقہ کے ساتھ کھلی کچہری کا انعقاد

لوئر چترال: ریجنل پولیس آفیسر ملاکنڈ زاہد نواز مروت کے خصوصی احکامات کی روشنی میں ڈسٹرکٹ پولیس آفیسر لوئر چترال محمد خالد خان نے وادی لٹکوہ کا دورہ کیا ، جہاں انہوں نے عمائدین علاقہ اور مقامی لوگوں کے ساتھ کھلی کچہری کا انعقاد کیا۔

کھلی کچہری میں ایس۔ڈی۔پی۔او سرکل لٹکوہ اقبال الدین، ایس۔ایچ۔او تھانہ لٹکوہ SI امتیاز احمد ، معززین و عمائدین علاقہ اور دیگر پولیس افسران بھی شریک تھے۔

اس موقع پر ڈی۔پی۔او لوئر چترال نے عوام کے مسائل اور شکایات تفصیل سے سنے۔ پولیس سے متعلق مسائل کو موقع پر حل کرنے کے لیے متعلقہ افسران کو ہدایات جاری کی گئیں، جبکہ دیگر محکموں سے متعلق مسائل کو متعلقہ حکام تک پہنچا کر ان کے حل کے لیے مؤثر اقدامات اٹھانے کی یقین دہانی کرائی گئی۔

کھلی کچہری کے دوران منشیات کے خاتمے ، منشیات فروشوں کے خلاف مؤثر کارروائیوں اور دیگر اہم معاشرتی مسائل پر بھی تفصیلی گفتگو کی گئی۔ ڈی۔پی۔او نے اس عزم کا اظہار کیا کہ معاشرے کو منشیات کی لعنت سے پاک کرنے، امن و امان کے قیام اور عوام کے جان و مال کے تحفظ کے لیے پولیس اپنی تمام تر صلاحیتیں بروئے کار لائے گی۔

انہوں نے مزید کہا کہ عوام اور پولیس کے درمیان باہمی اعتماد اور تعاون کو فروغ دے کر ہی ایک پرامن اور محفوظ معاشرے کا قیام ممکن ہے۔