اسلام آباد: وفاقی دارالحکومت سمیت پنجاب، خیبرپختونخوا اور آزاد کشمیر کے کئی شہروں میں زلزلے کے شدید جھٹکے محسوس کیے گئے ہیں۔
لاہور، پشاور، سوات سمیت مختلف شہروں میں زلزلے کے جھٹکے محسوس کیے جانے سے خوف وہراس پھیل گیا۔ لوگ کلمہ طیبہ کا ورد کرتے ہوئے گھروں سے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 6.3 ریکارڈ کی گئی جب کہ اس کا مرکز افغانستان کے کوہ ہندوکش میں تھا اور اس کی گہرائی 213 کلومیٹر تھی۔
انتظامیہ اور امدادی ٹیمیں صورتحال کا جائزہ لے رہی ہیں اور خوش قسمتی سے ابھی تک کسی جانی یا مالی نقصان کی اطلاع نہیں ملی ہے۔
بتادیں کہ چند روز قبل کوئٹہ شہر اور گردونواح میں زلزلے کے شدید جھٹکے محسوس کیے گئے تھے۔