واشنگٹن: یونی لیور پاکستان کی سابق سی ای او شازیہ سید کو فوربس نے مشرق وسطیٰ کی 100 طاقتور ترین کاروباری خواتین میں شامل کیا ہے۔
عالمی خبر رساں ادارے کے مطابق پاکستانی خاتون شازیہ سید اس وقت شمالی افریقہ، عراق اور سعودی عرب میں یونی لیور کے آپریشنز کی جنرل منیجر ہیں اور اس سے قبل وہ 2023 میں مشرق وسطیٰ میں اعلیٰ ترین ایگزیکٹوز میں سے ایک تھیں۔
فوربس نے شازیہ سید کو دوسری بار 100 طاقتور ترین کاروباری خواتین کی فہرست میں شامل کیا ہے۔ ایبٹ آباد، پاکستان سے تعلق رکھنے والی شازیہ سید نے یونی لیور پاکستان میں بطور مینجمنٹ ٹرینی اپنے پیشہ ورانہ سفر کا آغاز کیا۔
شازیہ سید نے تیزی سے ترقی کی سیڑھی چڑھی اور عالمی سطح پر یونی لیور کمپنی کے مارکیٹنگ، سیلز اور جنرل مینجمنٹ کے شعبوں کی قیادت کی۔
اس کے علاوہ شازیہ سید نے پاکستان اور دیگر ممالک میں کاروبار کی متحرک دنیا میں خواتین کو بااختیار بنانے اور ان کی ترقی کے لیے بھی نمایاں خدمات انجام دی ہیں۔
شازیہ سید نے سماجی رابطے کی ویب سائٹ پر لکھا کہ فوربز کی بااثر خواتین کی فہرست میں شامل ہونے پر وہ بہت خوش اور پرجوش ہیں۔ پیشہ ورانہ قیادت کا سفر آپ کی اقدار کو دلیری سے آگے بڑھانے کا ایک قابل ذکر کارنامہ ہے۔