تیمرگرہ (اسماعیل انجم سے) ضلعی پولیس لوئر دیر میں محکمانہ احتساب کے عمل کے تحت مختلف الزامات میں معطل اہلکاروں کے خلاف سخت کارروائی عمل میں لائی گئی۔ ڈی پی او لوئر دیر تیمور خان پی ایس پی کی ہدایات پر اہلکاروں کو اردلی روم میں پیش کیا گیا جہاں ہر کیس کا تفصیلی جائزہ لینے کے بعد شواہد کی بنیاد پر فیصلے سنائے گئے۔
پولیس ذرائع کے مطابق تحقیقات کے دوران بعض اہلکاروں کے قبضہ مافیا، ٹمبر مافیا اور منشیات فروش عناصر سے روابط کے علاوہ مالی و اخلاقی بدعنوانی اور دیگر غیر قانونی سرگرمیوں میں ملوث ہونے کے شواہد سامنے آئے۔ الزامات ثابت ہونے پر محکمانہ قواعد کے مطابق 11 اہلکاروں کو ملازمت سے برطرف (ڈسمس)، 17 کو جبری ریٹائرمنٹ جبکہ ایک اہلکار کو ملازمت سے علیحدہ (ریموول) کر دیا گیا۔
مزید کارروائی کے دوران سات اہلکاروں کے خلاف الزامات ثابت نہ ہونے پر انہیں سخت وارننگ (اینشور) جاری کی گئی۔ اسی طرح دو اہلکاروں کے خلاف کارروائی فائل کی گئی تھی تاہم مکمل جانچ پڑتال کے بعد ان کے خلاف بھی الزامات ثابت نہ ہو سکے۔
اس موقع پر ڈی پی او لوئر دیر تیمور خان پی ایس پی نے کہا کہ محکمہ پولیس میں احتساب کا عمل شفاف اور بلا امتیاز جاری ہے۔ انہوں نے کہا کہ قصور وار اہلکاروں کو قانون کے مطابق سزا دی جائے گی جبکہ بے گناہ اہلکاروں کے حقوق کا ہر صورت تحفظ کیا جائے گا۔ ان کا مزید کہنا تھا کہ بدعنوانی اور جرائم کے خلاف زیرو ٹالرنس پالیسی پر سختی سے عمل جاری رکھا جائے گا تاکہ عوام کا اعتماد مزید مستحکم ہو سکے۔