دیر(بیورو رپورٹ )ڈپٹی کمشنر دیر اپر نوید اکبر کی ہدایات پر  مائنڈ اسپارک انگلش لینگویج اینڈ کوچنگ اکیڈمی دیر اپر میں “ امن کے فروغ اور پُرتشدد انتہاپسندی کی روک تھام بذریعہ تعلیم” کے موضوع پر ایک روزہ سیشن کا انعقاد کیا گیا۔ یہ پروگرام مائنڈ اسپارک انگلش لینگویج اینڈ کوچنگ اکیڈمی دیر اپر نے ضلعی انتظامیہ اور ڈسٹرکٹ یوتھ آفس دیر اپر کے تعاون سے منعقد کیا۔تقریب کا آغاز تلاوتِ کلامِ پاک سے ہوا جس کے بعد نعتِ رسولِ مقبول ﷺ پیش کی گئی۔ طلبہ و طالبات نے انگریزی اور اردو دونوں زبانوں میں تقاریر پیش کیں۔ اس کے علاوہ امن اور پُرتشدد انتہاپسندی کی روک تھام کے موضوع پر ٹیبلو اور ڈرامے بھی پیش کیے گئے۔ پروگرام میں 100 سے زائد طلبہ و طالبات نے شرکت کی۔سیشن کا مقصد نوجوان نسل میں امن، برداشت، ہم آہنگی اور باہمی احترام کو فروغ دینا تھا۔ اس تقریب کا ہدف تعلیم کی اہمیت کو اجاگر کرنا تھا تاکہ پُرتشدد انتہاپسندی کی روک تھام کی جا سکے اور نوجوانوں کو مثبت سوچ، ذمہ دار شہری بننے اور معاشرے میں تعمیری کردار ادا کرنے کی طرف راغب کیا جا سکے۔ایڈیشنل اسسٹنٹ کمشنر دیر اپر سلمان ہشتم  کو بطور مہمانِ خصوصی مدعو کیا گیا۔ انہوں نے اپنے خطاب میں موضوع کی اہمیت پر روشنی ڈالتے ہوئے کہا کہ طلبہ امن کے فروغ میں اسکولوں اور معاشروں میں اہم کردار ادا کرتے ہیں۔ انہوں نے اس بات پر زور دیا کہ اساتذہ اور تعلیمی ادارے معیاری تعلیم اور آگاہی کے ذریعے ایک پُرامن معاشرے کی تعمیر میں بنیادی ستون کی حیثیت رکھتے ہیں۔ انہوں نے طلبہ کو ترغیب دی کہ وہ امن کے حقیقی سفیر بنیں اور اپنے گھروں، اسکولوں اور معاشروں میں مثبت تبدیلی لانے کے لیے کردار ادا کریں۔ٹقریب کے دوران سوال و جواب کا سیشن بھی منعقد کیا گیا جس میں طلبہ نے بھرپور شرکت کی اور اپنے خیالات کا اظہار کیا۔ طلبہ نے اس مثبت اور بامقصد پروگرام کے انعقاد پر ڈسٹرکٹ یوتھ آفس کا شکریہ ادا کیا۔تقریب میں دیگر معزز مہمانوں میں جناب ذریاب خان، جناب روحیل عباس، جناب لقمان عادل، جناب زوہیب جان، جناب مدثر احمد، مس سمیرا خان اور مس مدینہ اکرام شامل تھے۔

پروگرام کے اختتام پر شرکاء میں اسنادِ قدردانی تقسیم کی گئیں جبکہ مہمانِ خصوصی اور دیگر نمایاں مہمانوں کو شیلڈز پیش کی گئیں۔