سٹیٹ آفس نے ملک بھر میں سرکاری رہائش گاہوں کی الاٹمنٹ کی 28 ہزار سے زائد فائلیں ڈیجیٹل بنا دیں

اسلام آباد۔13نومبر (اے بی سی):سٹیٹ آفس نے سرکاری رہائش گاہوں کی الاٹمنٹ کے عمل میں شفافیت اور کارکردگی بہتر بنانے کے لیے اصلاحات کے تحت اسلام آباد اور چار دیگر بڑے شہروں میں الاٹمنٹ کی 28,116 فائلوں کو ڈیجیٹل شکل دے دی ہے۔ویلتھ پاکستان کو دستیاب ایک سرکاری دستاویز کے مطابق اسلام آباد میں اسٹیٹ آفس کی تمام 17,496 الاٹمنٹ فائلوں کو اسکین کرکے ڈیجیٹل بنا دیا گیا ہے۔ اس کے علاوہ کراچی، لاہور، کوئٹہ اور پشاور کے اسٹیٹ دفاتر میں مجموعی طور پر 11,014 فائلوں میں سے 10,620 فائلوں کو ڈیجیٹل شکل دی جا چکی ہے۔

یہ اقدام وسیع تر انتظامی اصلاحات کا حصہ ہے، جن کا مقصد وفاقی حکومت کے ملازمین کو سرکاری رہائش گاہوں کی الاٹمنٹ میں کارکردگی، جوابدہی اور میرٹ کی بنیاد پر فیصلوں کو بہتر بنانا ہے۔سٹیٹ آفس نے ویب پر مبنی ایک خودکار الاٹمنٹ نظام بھی تیار کرکے فعال کر دیا ہے، جس میں جنرل ویٹنگ لسٹ (جی ڈبلیو ایل) کے لیے آن لائن رجسٹریشن، سینیارٹی کا خودکار حساب، ایس ایم ایس کے ذریعے اطلاع اور درخواستوں کی پیش رفت کی آن لائن نگرانی کی سہولیات شامل ہیں۔اس نظام کے ذریعے انسانی مداخلت میں کمی آئی ہے، جبکہ محکمہ اب دستی درخواستیں وصول نہیں کرتا۔

اصلاحات کے تحت سرکاری ملازمین رہائش گاہوں کے حصول کے لیے آن لائن درخواست دے سکتے ہیں اور اپنی درخواستوں کی پیش رفت بھی دیکھ سکتے ہیں، جس سے اسٹیٹ آفس کے دفاتر میں ذاتی طور پر جانے کی ضرورت کم ہو گئی ہے۔دستاویز میں مزید بتایا گیا ہے کہ جولائی 2025 سے جون 2026 کے دوران اسلام آباد میں جنرل ویٹنگ لسٹ کے نظام کے ذریعے میرٹ کی بنیاد پر 894 سرکاری رہائش گاہیں الاٹ کی گئیں۔

ایک اور اہم اقدام کے تحت پہلے غیر قانونی طور پر زیر قبضہ 2,200 سرکاری مکانات کی الاٹمنٹ منسوخ کر دی گئی، جس کے بعد یہ رہائش گاہیں جنرل ویٹنگ لسٹ میں شامل اہل ملازمین کو الاٹ کر دی گئیں۔یہ کارروائی وفاقی کابینہ کی ہدایت پر شروع کیے گئے سروے کے بعد عمل میں لائی گئی۔

دستاویز کے مطابق وزارت ہاؤسنگ اینڈ ورکس نے 7 جون 2024 کو وہ پالیسی بھی واپس لے لی تھی، جس کے تحت سرکاری ملازمین کو دوسرے شہروں میں اپنی رہائش گاہوں کی الاٹمنٹ اسلام آباد منتقل کرانے کی اجازت حاصل تھی۔

دریں اثناسٹیٹ آفس کے تمام مراکز میں ای آفس نظام مکمل طور پر فعال ہو چکا ہے اور اب سرکاری فائلوں پر کارروائی کاغذی فائلوں کو دستی طور پر استعمال کیے بغیر الیکٹرانک طریقے سے کی جا رہی ہے۔