سوات کے سرکاری سکولوں کے اساتذہ کے لیے بچوں کے حقوق اور جسمانی سزا کے حوالے سے آگاہی سیشن

سوات(بیورورپورٹ) چائلڈ پروٹیکشن یونٹ سوات نے محکمہ تعلیم سوات کے تعاون سے تحصیل بابوزئی کے سرکاری پرائمری و سیکنڈری سکولوں کے اساتذہ کے لیے بچوں کے حقوق، تحفظ اور جسمانی سزا کے حوالے سے آگاہی سیشن کا انعقاد کیا۔ سیشن میں ڈسٹرکٹ چائلڈ پروٹیکشن آفیسر سوات نے اساتذہ کو بچوں کے حقوق، تحفظ اور مروجہ قوانین، بالخصوص جسمانی سزا سے متعلق قانونی دفعات، کے بارے میں آگاہ کیا اور تعلیمی اداروں میں بچوں کے لیے محفوظ اور پُرامن ماحول کی اہمیت پر زور دیا۔ ڈپٹی ڈسٹرکٹ آفیسر ایجوکیشن سوات فضل خالق نے بھی سیشن میں شرکت کی اور جسمانی سزا کے بچوں پر منفی اثرات سمیت اس کے قانونی و دیگر نتائج کے حوالے سے اساتذہ کو آگاہ کیا۔ سیشن کا مقصد اساتذہ میں بچوں کے حقوق اور تحفظ کے حوالے سے شعور اجاگر کرنا اور تعلیمی اداروں میں مثبت، غیر پُرتشدد اور بچوں کے لیے سازگار ماحول کو فروغ دینا تھا۔