سوات وومن چیمبر آف کامرس اینڈ انڈسٹری کا قیام، روبینہ ظفر صدر، ڈاکٹر یاسمین گل سینئر نائب صدر منتخب

سوات (بیورورپورٹ) سوات میں خواتین کو صنعتی، کاروباری اور تجارتی سرگرمیوں میں مؤثر نمائندگی فراہم کرنے کے لیے وومن چیمبر آف کامرس اینڈ انڈسٹری کا قیام عمل میں لایا گیا ہے، جبکہ کابینہ اور ایگزیکٹو ممبران کا انتخاب بھی کرلیا گیا۔ اس سلسلے میں گزشتہ روز منعقدہ انتخابی تقریب میں مختلف شعبہ ہائے زندگی سے تعلق رکھنے والی خواتین نے بھرپور شرکت کی۔ انتخابات کے نتیجے میں روبینہ ظفر صدر، ڈاکٹر یاسمین گل سینئر نائب صدر جبکہ ڈاکٹر ماریہ نائب صدر منتخب ہوگئیں۔ سوات وومن چیمبر آف کامرس اینڈ انڈسٹری کی فاؤنڈر فرزانہ شمس ہیں، جبکہ ایگزیکٹو ممبران میں فرہانہ شاہ، ماریہ سبحان، حسینہ بی بی، مسرت، نصرت اقبال، شبانہ، روبینہ، اقبال جہان، بشریٰ احمد، زارا شاہ، مرویٰ سراج، صباء اور شیبا شامل ہیں۔ نو منتخب عہدیداران اور ایگزیکٹو ممبران نے اس عزم کا اظہار کیا کہ سوات وومن چیمبر آف کامرس اینڈ انڈسٹری کو ایک فعال اور مؤثر پلیٹ فارم بنایا جائے گا، جہاں خواتین کو کاروباری، صنعتی اور تجارتی شعبوں میں درپیش مسائل کے حل کے لیے آواز اٹھائی جائے گی۔ انہوں نے کہا کہ سوات کی خواتین میں کاروبار اور ہنر کے حوالے سے بھرپور صلاحیتیں موجود ہیں، تاہم انہیں مناسب پلیٹ فارم، رہنمائی، مواقع اور مارکیٹ تک رسائی فراہم کرنے کی ضرورت ہے۔ چیمبر کی قیادت نے خواتین کو صنعتی و کاروباری میدان میں بھرپور نمائندگی دلانے، ان کے مسائل متعلقہ اداروں تک پہنچانے اور کاروباری سرگرمیوں کے فروغ کے لیے سازگار ماحول کی فراہمی کے عزم کا اظہار کیا۔