ملاکنڈ ڈویژن میں ٹیکس کے نفاذ کے خلاف تحریک کی حمایت کرتے ہیں، محمد انور زمان

سوات (بیورو رپورٹ) پاکستان تحریک انصاف پارلیمنٹیرینز کے مرکزی صدر محمد انور زمان نے ملاکنڈ ڈویژن میں ٹیکس کے نفاذ کے خلاف تاجروں اور عوام کی جاری تحریک کی مکمل حمایت کا اعلان کرتے ہوئے کہا ہے کہ پارٹی ملاکنڈ ڈویژن کی خصوصی حیثیت کی بحالی کے مطالبے کی بھی بھرپور حمایت کرتی ہے۔ ان کا کہنا تھا کہ اس معاملے پر پی ٹی آئی پارلیمنٹیرینز کا موقف واضح اور دوٹوک ہے اور پارٹی عوام و تاجر برادری کے مطالبات کے لیے اپنا بھرپور سیاسی و جمہوری کردار ادا کرے گی۔ محمد انور زمان نے کہا کہ مرکزی چیئرمین محمود خان نے بھی پشاور میں منعقدہ گرینڈ جرگے میں ملاکنڈ ڈویژن میں ٹیکس کے نفاذ کی واضح مخالفت کی ہے اور خصوصی حیثیت کی بحالی کو ضروری قرار دیا ہے۔ انہوں نے کہا کہ یہ کسی ایک سیاسی جماعت یا تاجر برادری کا نہیں بلکہ پورے ملاکنڈ ڈویژن کے عوام کا مشترکہ مسئلہ ہے، اس لیے تمام سیاسی و سماجی قوتوں کو عوامی مطالبات کے حل کے لیے اپنا کردار ادا کرنا چاہیے۔ ان کا کہنا تھا کہ ملاکنڈ ڈویژن کی خصوصی حیثیت کی بحالی سے ٹیکس سے متعلق عوام کے مسائل کے حل کی راہ ہموار ہوگی، جبکہ پی ٹی آئی پارلیمنٹیرینز ٹیکس کے نفاذ کے خلاف جاری تحریک کا بھرپور حصہ بنے گی اور آئندہ بھی عوام و تاجر برادری کے جائز مطالبات کے لیے ہر ممکن تعاون جاری رکھے گی۔
۔۔۔۔