سوات میں موسمیاتی تبدیلی اور صحت کے باہمی تعلق پر اہم مشاورتی نشست، منصوبے کی اختتامی تقریب بھی منعقد
سوات(بیورورپورٹ)سوات میں کمیونٹی ایکشن پلان اور ضلعی صحت موافقتی منصوبے پر ایک روزہ ورکشاپ اور منصوبے کی اختتامی تقریب انوائرنمنٹل پروٹیکشن سوسائٹی (ای پی ایس) اور انٹرنیشنل ریسکیو کمیٹی (آئی آر سی) کی شراکت سے سنوفی فاؤنڈیشن کے مالی تعاون کے تحت منعقد کی گئی۔ ورکشاپ میں موسمیاتی تبدیلی اور صحت کے باہمی تعلق، موسمیاتی حساس بیماریوں سے بچاؤ، کمیونٹی کی تیاری اور ضلعی صحت کے نظام کو موسمیاتی خطرات سے ہم آہنگ کرنے پر گفتگو کی گئی۔ اس میں پانی سے پیدا ہونے والی بیماریوں اور دیگر موسمی بیماریوں پر تفصیلی بحث کی گئی۔ شرکاء نے اس بات پر زور دیا کہ موسمیاتی تبدیلی کے بڑھتے ہوئے اثرات کے پیشِ نظر صحت کے شعبے میں پیشگی تیاری اور اداروں کے مابین مؤثر رابطہ کاری کو مزید مضبوط بنانے کی ضرورت ہے۔
اس موقع پر ایڈیشنل ڈپٹی کمشنر (جنرل) سوات، محیب اللہ نے موسمیاتی تبدیلی کے نتیجے میں صحت کو درپیش چیلنجز سے نمٹنے کے لیے ضلعی انتظامیہ، محکمہ صحت، متعلقہ لائن ڈیپارٹمنٹس، غیر سرکاری اداروں اور کمیونٹی کے درمیان مؤثر تعاون کی اہمیت کو اجاگر کیا۔ انہوں نے کمیونٹی کی شمولیت اور آگاہی کو صحت کے خطرات میں کمی لانے کے لیے اہم قرار دیا۔
پراجیکٹ پر ای پی ایس کے ایگزیکٹو ڈائریکٹر اکبر زیب، پروگرام منیجر مسرور احمد، اور آئی آر سی خیبر پختونخوا آفس کے انچارج سعید گل، پروگرام منیجر رابعہ جبین اور پراجیکٹ آفیسر ندا امان نے تفصیلی گفتگو کی۔
اختتامی تقریب کے دوران منصوبے کے تحت مکمل کی گئی سرگرمیوں، اہم کامیابیوں، حاصل شدہ اسباق اور مستقبل کے لیے ترجیحی اقدامات کا جائزہ لیا گیا۔ شرکاء نے اس عزم کا اظہار کیا کہ منصوبے کے اختتام کے بعد بھی موسمیاتی تبدیلی کے باعث صحت پر مرتب ہونے والے اثرات، وبائی امراض سے بچاؤ، صاف پانی و صفائی، ماحولیاتی تحفظ اور کمیونٹی کی آگاہی سے متعلق اقدامات کو متعلقہ اداروں کے تعاون سے آگے بڑھایا جائے گا۔
۔۔۔۔
