پاکستان ریلوے نے کراچی میں 364 ایکڑ اراضی سے قبضہ واگزار کرا لیا

اسلام آباد۔15نومبر (اے بی سی):پاکستان ریلوے نے مالی سال 23-2022سے 26-2025 تک چار مالی سالوں کے دوران کراچی ڈویژن میں تقریباً 364 ایکڑ مقبوضہ اراضی واگزار کرائی، جس میں سب سے زیادہ حصہ زرعی زمین کا رہا۔ویلتھ پاکستان کو دستیاب وزارت ریلوے کی سرکاری دستاویزات کے مطابق اس عرصے کے دوران مجموعی طور پر 363.907 ایکڑ اراضی واگزار کرائی گئی، جس میں 305.803 ایکڑ زرعی، 29.844 ایکڑ رہائشی اور 28.319 ایکڑ تجارتی اراضی شامل تھی۔سب سے زیادہ سالانہ اراضی مالی سال 2024-25 میں واگزار کرائی گئی، جب مجموعی طور پر 293.6 ایکڑ زمین سے قبضہ ختم کرایا گیا۔

اس میں 285.31 ایکڑ زرعی، 7.458 ایکڑ تجارتی اور 0.832 ایکڑ رہائشی اراضی شامل تھی۔مالی سال 2023-24 میں محکمہ ریلوے نے 38.93 ایکڑ اراضی واگزار کرائی، جبکہ مالی سال 2025-26 میں 23.148 ایکڑ اور مالی سال 2022-23 میں 8.229 ایکڑ زمین سے قبضہ ختم کرایا گیا۔دستاویزات سے مزید ظاہر ہوتا ہے کہ پاکستان ریلوے نے جولائی سے اکتوبر 2026 کے دوران کراچی ڈویژن میں 8.992 ایکڑ اراضی سے تجاوزات ختم کرائیں۔ واگزار کرائی گئی زمین میں 6.49 ایکڑ زرعی، 1.986 ایکڑ تجارتی اور 0.516 ایکڑ رہائشی اراضی شامل تھی۔

ڈپٹی کمشنر کے مقرر کردہ نرخوں کے مطابق ان چار ماہ کے دوران واگزار کرائی گئی اراضی کی مجموعی مالیت تقریباً 30 کروڑ 56 لاکھ 80 ہزار روپے لگائی گئی۔مالیت کے لحاظ سے ستمبر میں سب سے زیادہ اراضی واگزار کرائی گئی، جب 1.52 ایکڑ تجارتی اور 1.99 ایکڑ زرعی زمین سے قبضہ ختم کرایا گیا۔ اس اراضی کی مجموعی مالیت تقریباً 21 کروڑ 75 لاکھ 90 ہزار روپے تھی۔اکتوبر میں محکمہ ریلوے نے 0.366 ایکڑ تجارتی، 0.176 ایکڑ رہائشی اور 4.5 ایکڑ زرعی اراضی واگزار کرائی، جس کی مجموعی مالیت تقریباً 8 کروڑ 49 لاکھ 60 ہزار روپے تھی۔

جولائی میں 0.1 ایکڑ تجارتی اور 0.2 ایکڑ رہائشی اراضی سے قبضہ ختم کرایا گیا، جبکہ اگست میں 0.14 ایکڑ رہائشی زمین واگزار کرائی گئی۔دستاویزات کے مطابق کراچی ڈویژن میں پاکستان ریلوے کی 951.28 ایکڑ اراضی اب بھی نجی افراد کے غیر قانونی قبضے میں ہے۔مقبوضہ اراضی میں سب سے زیادہ حصہ رہائشی تجاوزات کا ہے، جو 794.5 ایکڑ پر محیط ہیں۔ اس کے بعد تجارتی تجاوزات کا رقبہ 123.28 ایکڑ ہے۔مزید 33.5 ایکڑ اراضی دیگر نوعیت کے قبضوں میں ہے، جن میں مساجد اور قبرستان بھی شامل ہیں۔

دستاویز میں اراضی کی نوعیت کے لحاظ سے دی گئی اس تفصیل میں کسی زرعی زمین پر قبضہ ظاہر نہیں کیا گیا۔ریلوے کے مختلف سیکشنز کے لحاظ سے جائزے سے معلوم ہوتا ہے کہ کیماڑی سے کوٹری سیکشن میں سب سے زیادہ 409.28 ایکڑ ریلوے اراضی پر قبضہ ہے۔اس کے بعد کوٹری سے ٹنڈو آدم سیکشن میں 246 ایکڑ اور حیدرآباد سے بدین سیکشن میں 108.9 ایکڑ اراضی پر تجاوزات موجود ہیں۔دیگر متاثرہ سیکشنز میں کوٹری سے دادو شامل ہے، جہاں 57 ایکڑ اراضی پر قبضہ ہے، جبکہ کراچی سرکلر ریلوے کی 53 ایکڑ زمین تجاوزات کی زد میں ہے۔اسی طرح میرپورخاص سے کھوکھراپار سیکشن میں 30 ایکڑ، میرپورخاص سے نواب شاہ میں 18 ایکڑ، پتھورو سے جھڈو اور جام راؤ سیکشن میں 17 ایکڑ اور حیدرآباد سے میرپورخاص سیکشن میں 12 ایکڑ ریلوے اراضی پر قبضہ ہے۔

ریلوے کی املاک کی واگزاری کا عمل تیز کرنے کے لیے پاکستان ریلوے نے نومبر 2026 کے دوران کراچی ڈویژن میں تجاوزات کے خلاف کارروائیوں کا شیڈول تیار کیا ہے۔اس پروگرام کے تحت غیر مجاز رہائشیوں کے قبضے میں موجود ریلوے کے رہائشی کوارٹرز خالی کرائے جائیں گے، اسٹیشن یارڈز اور ریلوے کی حدود میں قائم تجارتی تجاوزات ختم کی جائیں گی اور دیگر غیر قانونی قبضوں کے خلاف بھی کارروائی کی جائے گی۔

طے شدہ کارروائیوں میں کراچی، حیدرآباد، کوٹری، ٹنڈو آدم، سیہون، دادو اور کراچی ڈویژن کی حدود میں آنے والے دیگر علاقے شامل ہیں۔