ثمر باغ میں ایک روزہ مفت میڈیکل کیمپ، سینکڑوں مریض مستفید

ثمر باغ( بیورو رپورٹ ) ضلع لوئر دیر کے پسماندہ اور دور افتادہ علاقے شاہی تحصیل ثمر باغ کے عوام کے لیے صحت کی سہولیات ان کی دہلیز پر پہنچانے کا سلسلہ جاری ہے۔ اسی مقصد کے تحت ضلعی انتظامیہ لوئر دیر نے ڈسٹرکٹ ہیلتھ آفیسر کے اشتراک سے شاہی ریسٹ ہاؤس میں ایک روزہ مفت میڈیکل اور مفت ادویات کی تقسیم کے کیمپ کا انعقاد کیا، جس سے شاہی اور ملحقہ علاقوں کے سینکڑوں غریب اور نادار مریضوں نے استفادہ کیا۔

کیمپ صبح سویرے شروع ہوا تو دور دراز دیہاتوں سے مرد، خواتین اور بچوں کی بڑی تعداد ریسٹ ہاؤس پہنچ گئی۔ محکمہ صحت کی جانب سے ماہر فزیشنز، امراض نسواں کی ماہر ڈاکٹرز اور جنرل ڈیوٹی میڈیکل آفیسرز پر مشتمل تجربہ کار ٹیم نے مریضوں کا تفصیلی معائنہ کیا۔ معائنے کے بعد ڈاکٹروں کے تجویز کردہ نسخوں کے مطابق تمام مریضوں کو ضلعی انتظامیہ اور ڈی ایچ او آفس کی جانب سے فراہم کردہ معیاری ادویات بالکل مفت دی گئیں۔

کیمپ صرف علاج تک محدود نہیں رہا، بلکہ وہاں موجود شہریوں کو موسم سرما میں پھیلنے والی بیماریوں سے بچاؤ، صفائی ستھرائی کی اہمیت اور متوازن غذا کے استعمال کے حوالے سے بھی خصوصی آگاہی فراہم کی گئی، تاکہ لوگ بیماریوں سے پہلے ہی احتیاط کر سکیں۔

کیمپ کی تمام سرگرمیوں کی براہ راست نگرانی اسسٹنٹ کمشنر ثمر باغ محمد ایاز نے کی۔ انہوں نے کیمپ کا تفصیلی دورہ کیا، مختلف کاؤنٹرز کا جائزہ لیا اور وہاں موجود مریضوں سے ملاقات کر کے علاج معالجے کی سہولیات اور ادویات کی دستیابی کے بارے میں دریافت کیا۔

اس موقع پر اسسٹنٹ کمشنر محمد ایاز نے کہا کہ یہ کیمپ ڈپٹی کمشنر لوئر دیر کی خصوصی ہدایات پر لگایا گیا ہے۔ ان کا کہنا تھا کہ انتظامیہ کا ہدف ان لوگوں تک صحت کی بنیادی سہولت پہنچانا ہے جو مالی تنگی یا طویل سفر کی مشکلات کے باعث بڑے ہسپتالوں تک نہیں جا سکتے۔ انہوں نے یقین دلایا کہ عوامی فلاح و بہبود کے لیے اس طرح کے اقدامات آئندہ بھی جاری رکھے جائیں گے۔

شاہی ثمر باغ اور گردونواح کے عوام نے اس اقدام کو غریب عوام کے لیے بڑی نعمت قرار دیتے ہوئے ڈپٹی کمشنر لوئر دیر، اسسٹنٹ کمشنر ثمر باغ محمد ایاز اور ڈسٹرکٹ ہیلتھ آفیسر کی کاوشوں کو بے حد سراہا۔ مقامی لوگوں کا کہنا تھا کہ اس طرح کے کیمپ دور دراز علاقوں کے لیے کسی نعمت سے کم نہیں، اور انہیں وقتاً فوقتاً لگایا جانا چاہیے۔