لاہور میں اسموگ پر قابو پانے کے لیے بانس کی کاشت کو فروغ دینے کا فیصلہ

لاہور ۔15نومبر (اے بی سی):چین کے مختلف شہروں میں اسموگ پر قابو پانے کے لیے بانس کے کامیاب استعمال سے متاثر ہو کر محکمہ جنگلات پنجاب نے شہری جنگلات اور سبز بنیادی ڈھانچے کے فروغ کے منصوبے کے تحت لاہور میں بانس کی شجرکاری کو فروغ دینا شروع کر دیا ہے۔ اس اقدام کا بنیادی مقصد فضائی معیار کو بہتر بنانا ہے، جو موسم سرما کے دوران نمایاں طور پر خراب ہو جاتا ہے۔محکمہ جنگلات پنجاب کے حکام کے مطابق بانس کی کاشت دنیا بھر کے شہروں میں اسموگ میں کمی اور فضائی آلودگی کے خاتمے کے لیے فطرت پر مبنی ایک مؤثر حکمت عملی کے طور پر سامنے آ رہی ہے۔

محکمہ جنگلات پنجاب کے ترجمان نے بتایا کہ شہری علاقوں کو سرسبز بنانے کی حکمت عملی کے تحت لاہور کے علی ٹاؤن، مولانا شوکت علی روڈ اور رائیونڈ روڈ سمیت مختلف علاقوں میں بانس کے 20 ہزار سے زائد پودے لگائے جا چکے ہیں۔ویلتھ پاکستان سے گفتگو کرتے ہوئے انہوں نے کہا کہ سرگودھا، جھنگ، خوشاب، منڈی بہاؤالدین، قصور، نارووال، شیخوپورہ اور گوجرانوالہ جیسے اضلاع میں نجی زرعی اور آبپاشی والی زمینوں پر بھی بانس کی تجارتی کاشت شروع کی گئی ہے، جہاں تیزی سے بڑھنے والی اس قسم کو 20 ہزار ایکڑ سے زائد رقبے پر کاشت کیا جا رہا ہے۔انہوں نے وضاحت کی کہ بانس تیزی سے بڑھنے والا پودا ہے، جو فضا سے کاربن جذب کرکے اسے ذخیرہ کرنے، نباتاتی مادے کی پیداوار، مٹی کے تحفظ اور سرسبز مقامات کی ترقی میں اہم کردار ادا کرتا ہے۔

ترجمان نے مزید بتایا کہ محکمہ جنگلات کی جانب سے حیاتیاتی تنوع میں اضافے اور ماحولیاتی نظام کو طویل مدت تک مستحکم بنانے کی کوششوں میں مقامی درختوں کے ساتھ بانس کی کاشت کو بھی خصوصی اہمیت دی جا رہی ہے۔محکمے کی شہری جنگلات کی حکمت عملی کے تحت شجرکاری کے لیے شہری اور مضافاتی علاقوں میں موزوں مقامات کو ترجیح دی جا رہی ہے، جن میں سڑکوں کے اطراف، سرکاری و ادارہ جاتی زمینیں، کھلی جگہیں اور ایسے علاقے شامل ہیں جہاں آلودگی سے بچاؤ کے لیے سبز حفاظتی پٹیاں قائم کرنے کی ضرورت ہے۔

ان مقامات کا انتخاب متعلقہ اداروں کے تعاون سے کیا جاتا ہے، جس میں زمین کی دستیابی، مٹی کی صورتحال، پانی کی ضروریات اور بانس کی مختلف اقسام کی موزونیت کو مدنظر رکھا جاتا ہے۔ترجمان نے اسموگ پر قابو پانے اور شہری ماحول کو بہتر بنانے کے لیے سرکاری اداروں کے درمیان مربوط کوششوں کی ضرورت پر زور دیا۔انہوں نے کہا کہ شہری علاقوں میں سبزے کا رقبہ بڑھانے کے لیے محکمہ جنگلات پارکس اینڈ ہارٹیکلچر اتھارٹی (پی ایچ اے)، مقامی حکومتوں، تعلیمی اداروں اور دیگر متعلقہ اداروں کے ساتھ تعاون کر رہا ہے۔

اس نوعیت کی شراکت داری سے شجرکاری کے لیے موزوں مقامات کی نشاندہی کے ساتھ لگائے گئے پودوں کے تحفظ اور دیکھ بھال کو یقینی بنانے میں بھی مدد ملتی ہے۔ماحولیاتی تحفظ کے ماہرین نے لاہور میں بانس کی کاشت کو فروغ دینے کے حکومتی اقدامات کی حمایت کی ہے۔ تاہم انہوں نے خبردار کیا کہ شہر میں اسموگ کے مسئلے سے نمٹنے کے لیے صرف بانس کی کاشت پر انحصار نہیں کرنا چاہیے۔

ماحولیاتی امور کے مشیر اور محکمہ تحفظ ماحولیات کے سابق ڈائریکٹر نسیم الرحمٰن شاہ نے کہا کہ نیم جیسے مقامی درخت ہمیشہ سے ماحولیاتی آلودگی کم کرنے اور کاربن کی زیادہ مقدار جذب کرکے موسمیاتی تبدیلیوں کے اثرات سے نمٹنے میں مددگار ثابت ہوئے ہیں۔تاہم انہوں نے تسلیم کیا کہ بانس بھی مختلف ماحولیاتی افعال میں اہم کردار ادا کر سکتا ہے۔ویلتھ پاکستان سے گفتگو کرتے ہوئے انہوں نے وضاحت کی کہ بانس بہت سی روایتی درختوں کی اقسام کے مقابلے میں نمایاں طور پر زیادہ کاربن ڈائی آکسائیڈ جذب کرتا ہے اور تقریباً 35 فیصد زیادہ آکسیجن خارج کرتا ہے۔

بانس کی قسم کے لحاظ سے یہ سالانہ فی ہیکٹر کئی ٹن کاربن ڈائی آکسائیڈ جذب کر سکتا ہے۔ماحولیاتی ماہر نے کہا کہ بانس کے گھنے پتوں اور ان کی مومی سطحوں کی وجہ سے ہوا میں موجود آلودہ ذرات، خصوصاً پی ایم 2.5، سلفر ڈائی آکسائیڈ، نائٹروجن آکسائیڈ اور شہری و صنعتی علاقوں میں موجود دیگر گیسوں کو روکنے میں مدد ملتی ہے۔انہوں نے مزید بتایا کہ کاربن ڈائی آکسائیڈ جذب کرنے کے علاوہ بانس پانی کی آلودگی کم کرنے میں بھی اہم کردار ادا کرتا ہے۔

ان کے مطابق پودوں کے ذریعے آلودگی کے خاتمے کے قدرتی عمل، جسے فائٹوری میڈیشن کہا جاتا ہے، اور جڑوں کے ذریعے آلودہ مادوں کو جذب کرنے کے طریقہ کار کے تحت بانس کی وسیع جڑیں گندے پانی سے اضافی نائٹروجن، سیوریج میں موجود آلودہ مادوں اور بھاری دھاتوں کو جذب کرتی ہیں۔

اس عمل سے آلودہ پانی کے بہاؤ کو روکنے اور آبی آلودگی کم کرنے میں مدد ملتی ہے۔