سوات: قمبر بائی پاس پر غیر معیاری گوشت اور جانوروں کے اعضا کی ترسیل کے خلاف کارروائی، 8 ڈرم ضبط کرکے تلف کر دیے گئے

سوات (بیورو رپورٹ)ڈپٹی کمشنر سوات عدنان ابرار کی خصوصی ہدایات پر ایڈیشنل اسسٹنٹ کمشنر-I بابوزئی افنان رضا نے قمبر بائی پاس پر دوسرے اضلاع سے سوات لائے جانے والے گوشت اور جانوروں کے اعضا کی ترسیل کے خلاف کارروائی کی۔ کارروائی کے دوران گوشت اور جانوروں کے اعضا سے بھرے 8 ڈرم قبضے میں لے لیے گئے۔ بعدازاں محکمہ لائیوسٹاک سوات اور خیبر پختونخوا فوڈ سیفٹی اینڈ حلال فوڈ اتھارٹی سوات کی ٹیموں نے ضبط شدہ مواد کا تفصیلی معائنہ کیا اور اسے انسانی استعمال کے لیے غیر موزوں اور مضرِ صحت قرار دیا۔ ماہرین کی جانچ کے بعد تمام ضبط شدہ گوشت اور جانوروں کے اعضا کو تلف کر دیا گیا تاکہ یہ مضرِ صحت مواد مقامی بازاروں تک پہنچ کر شہریوں کی زندگیوں اور صحت کے لیے خطرہ نہ بن سکے۔ ضلعی انتظامیہ کے مطابق غیر معیاری گوشت اور مضرِ صحت اشیائے خورونوش کی ترسیل، ذخیرہ اندوزی اور فروخت کی روک تھام کے لیے نگرانی اور کارروائیاں جاری ہیں۔ انتظامیہ نے واضح کیا ہے کہ عوام کی صحت پر کوئی سمجھوتہ نہیں کیا جائے گا اور انسانی صحت سے کھیلنے والے عناصر کے خلاف قانون کے مطابق کارروائی عمل میں لائی جائے گی۔
۔۔۔۔۔