جندول میں ایل پی جی کی قیمتوں میں من مانا اضافہ، سرکاری نرخ 294 روپے جبکہ فروخت 700 روپے فی کلو تک پہنچ گئی

انتظامیہ اور اوگرا سے ایل پی جی پلانٹ مافیا کے خلاف فوری کارروائی کا مطالبہ، پٹرولیم مصنوعات کی قیمتوں میں کمی کے ساتھ اشیائے خوردونوش سستی کرنے پر بھی زور

جندول (لیاقت سیماب درانی) ضلع دیر لوئر کے علاقے جندول میں ایل پی جی گیس کی قیمتوں میں مبینہ من مانے اضافے نے عوام کو شدید مشکلات سے دوچار کر دیا ہے۔ شہریوں کے مطابق سرکاری نرخ 294 روپے فی کلو مقرر ہونے کے باوجود بعض مقامات پر ایل پی جی 650 روپے فی کلو تک فروخت کی جا رہی ہے، جبکہ متعلقہ اداروں اور انتظامیہ کی جانب سے مؤثر کارروائی نہ ہونے پر عوامی حلقوں میں تشویش پائی جاتی ہے۔

شہریوں کا کہنا ہے کہ اوگرا ہو یا ضلعی انتظامیہ، ایل پی جی پلانٹس اور گیس فروخت کرنے والوں کی مبینہ من مانی کے سامنے کوئی مؤثر کارروائی نظر نہیں آ رہی۔ عوام نے سوال اٹھایا ہے کہ جب سرکاری نرخ نامے موجود ہیں تو پھر ان پر عملدرآمد کیوں نہیں ہو رہا؟

عوامی حلقوں نے واضح کیا ہے کہ وہ حکومتی اقدامات اور پٹرولیم مصنوعات کی قیمتوں میں کمی کی حمایت کرتے ہیں، تاہم صرف پٹرول سستا ہونے سے عام شہری کو حقیقی ریلیف نہیں مل سکتا، کیونکہ اس کا براہ راست فائدہ زیادہ تر ٹرانسپورٹ مالکان اور ڈرائیوروں کو پہنچتا ہے، جبکہ اشیائے خوردونوش، ٹرانسپورٹ کرایوں اور دیگر ضروریات زندگی کی قیمتوں میں کمی نظر نہیں آتی۔

شہریوں نے ضلعی انتظامیہ، اوگرا اور دیگر متعلقہ اداروں سے مطالبہ کیا ہے کہ ایل پی جی کی مقررہ قیمت پر فروخت یقینی بنائی جائے، منافع خوری اور ناجائز اضافے کے خلاف کارروائی کی جائے اور پٹرولیم مصنوعات کی قیمتوں میں کمی کے تناسب سے اشیائے خوردونوش سمیت دیگر ضروری اشیا کی قیمتوں میں بھی کمی لائی جائے تاکہ مہنگائی سے پریشان عام آدمی کو حقیقی ریلیف مل سکے۔