سوات: نجی سکول طالب علم کی ویڈیو کیس، ایک ملزم ضمانت پر رہا، دو کا جسمانی ریمانڈ

سوات (بیورو رپورٹ) سیدو شریف میں سکول کے جماعت نہم کے طالب علم کی برہنہ ویڈیو بنانے اور ویڈیو وائرل کرنے کی دھمکی دینے کے مقدمے میں گرفتار تینوں ملزمان کو عدالت میں پیش کردیا گیا۔ پولیس کے مطابق ملزمان عبداللہ ولد یعقوب، صابر ولد اقبال حسین اور محمد بلاول ولد فرمان ساکنان آخون بابا نے اپنے ہی سکول کے طالب علم محمد سدید کو مبینہ طور پر پارٹی کے بہانے حجرے میں بلایا، جہاں اس کے ساتھ بدفعلی کی، اس کی برہنہ ویڈیو ریکارڈ کی اور کسی کو بتانے کی صورت میں جان سے مارنے اور ویڈیو سوشل میڈیا پر وائرل کرنے کی دھمکیاں دیں۔ واقعے کی ویڈیو سوشل میڈیا پر گردش کرنے کے بعد ڈی پی او سوات محمد عمر خان نے نوٹس لیتے ہوئے ایس ایچ او تھانہ سیدو شریف ضیاء الرحمن کو کارروائی کی ہدایت کی، جس پر پولیس نے تینوں ملزمان کو گرفتار کیا۔ گرفتار ملزمان کو عدالت میں پیش کیا گیا، جہاں کم سن ملزم محمد عبداللہ، عمر 13 سال، کو کم عمری کے باعث عدالت نے ضمانت پر رہا کردیا، جبکہ دیگر دو ملزمان کو ایک روزہ جسمانی ریمانڈ پر پولیس کے حوالے کردیا گیا۔ پولیس کے مطابق دونوں ملزمان کو آج ہفتے کے روز دوبارہ عدالت میں پیش کیا جائے گا۔
۔۔۔