پاکستان

شہید بینظیر بھٹو یونیورسٹی شرینگل میں دو روزہ عالمی کانفرنس کا آغاز

نومبر 16, 2026 • Press Release

شرینگل) تحصیل رپورٹر (شہید بینظیر بھٹو یونیورسٹی شرینگل میں دو روزہ عالمی کانفرنس کا آغاز
ملک بھر کی جامعات اور بیرونِ ملک سے ممتاز محققین و سائنسدان شریک۔ شہید بینظیر بھٹو یونیورسٹی شرینگل کے شعبہ بائیوٹیکنالوجی کے زیرِ اہتمام، ایچ ای سی، پاسٹک، اے ایف او بی اور ڈی وائی او کے تعاون سے دو روزہ عالمی کانفرنس کا انعقاد کیا گیا۔ کانفرنس کا موضوع ”Recent Advances in Green Biotechnology & Climate Change“ ہے۔ افتتاحی سیشن میں ملک بھر کی مختلف جامعات سے ممتاز محققین، جید سائنسدان، فیکلٹی ممبران، شعبہ جاتی سربراہان اور انتظامی افسران نے شرکت کی۔افتتاحی سیشن میں اسسٹنٹ کمشنر شرینگل نورشیر مہمند بطور مہمانِ خصوصی، رجسٹرار ایس بی بی یو ڈاکٹر بادشاہ حسین، چیف آرگنائزر ڈاکٹر محمد آصف نواز، سیکرٹری جنرل اے ایف او بی پروفیسر ڈاکٹر محمد عامر محمود، ڈاکٹر سید عبدالخالق جان، پروفیسر ڈاکٹر محمد نعمان احمد، معاون آرگنائزر ڈاکٹر اللہ دتہ، جامعہ کے فیکلٹی ممبران، شعبہ جاتی سربراہان اور ملک بھر سے آئے ممتاز محققین نے شرکت کی۔وائس چانسلر پروفیسر ڈاکٹر اقبال منیر کی نمائندگی کرتے ہوئے رجسٹرار ڈاکٹر بادشاہ حسین نے افتتاحی سیشن سے خطاب کرتے ہوئے کہا کہ انسان نے فطرت کو بدلنے کی طاقت تو حاصل کر لی ہے، لیکن کیا اس نے فطرت کو محفوظ رکھنے کی دانش بھی حاصل کی ہے؟ انہوں نے کہا کہ سائنس ہمیں طاقت دیتی ہے، فلسفہ بصیرت عطا کرتا ہے اور اخلاقیات درست سمت دکھاتی ہیں۔ سائنس کا اصل مقصد محض زندگی کو سمجھنا نہیں، بلکہ اسے بہتر بنانا اور تحفظ فراہم کرنا ہے۔انہوں نے کہا کہ سبز حیاتیاتی ٹیکنالوجی ہمیں ترقی کے مفہوم پر ازسرِ نو غور کرنے کا موقع دیتی ہے، جس کا مقصد قدرتی وسائل کا بے دریغ استعمال نہیں بلکہ علم کو فطرت کے ساتھ ہم آہنگ کرنا ہے۔ شرینگل کی پہاڑی وادیوں میں کھڑے ہو کر ہمیں یاد رکھنا چاہیے کہ فطرت ہماری تحقیق کا صرف موضوع نہیں، بلکہ ہماری زندگی کی بنیاد ہے۔ انہوں نے قرآن مجید کا حوالہ دیتے ہوئے کہا: ”اور زمین میں اس کی اصلاح کے بعد فساد نہ پھیلاؤ۔“ (سورۃ الاعراف، 7:56)
مہمانِ خصوصی اسسٹنٹ کمشنر شرینگل نورشیر مہمند نے مہمانوں کو خوش آمدید کہا، یونیورسٹی انتظامیہ اور وائس چانسلر کو کانفرنس کے کامیاب انعقاد پر مبارکباد دی اور ضلعی انتظامیہ کی جانب سے بھرپور تعاون کی یقین دہانی کرائی۔ انہوں نے کہا کہ موسمیاتی تبدیلی اور سبز حیاتیاتی ٹیکنالوجی جیسے موضوعات پر علمی گفتگو وقت کی اہم ضرورت ہے؛ اس نوعیت کی کانفرنسیں تحقیق، پائیدار ترقی اور ماحولیاتی تحفظ کے لیے نئے راستے روشن کرتی ہیں۔چیف آرگنائزر ڈاکٹر محمد آصف نواز نے مہمانوں کو خوش آمدید کہتے ہوئے کہا کہ یہ کانفرنس محققین، ماہرین، پالیسی سازوں اور طلبہ کو ایک پلیٹ فارم پر جمع کرتی ہے۔ سبز حیاتیاتی ٹیکنالوجی اور موسمیاتی تبدیلی کے چیلنجز سے نمٹنے کے لیے بین الاقوامی تعاون، تحقیقی روابط اور عملی حل ناگزیر ہیں۔سیکریٹری جنرل اے ایف او بی پروفیسر ڈاکٹر محمد عامر محمود نے کانفرنس کے اغراض و مقاصد پر گفتگو کرتے ہوئے کہا کہ اے ایف او بی کی جانب سے علمی تعاون اور بین الاقوامی نیٹ ورکنگ کو فروغ دینا اولین ترجیح ہے۔ انہوں نے کہا کہ حیاتیاتی ٹیکنالوجی کے جدید تحقیقی نتائج کو کھیتی باڑی، خوراک کے تحفظ اور ماحولیاتی بحالی سے جوڑنا ضروری ہے۔پروفیسر ڈاکٹر محمد نعمان احمد نے افتتاحی سیشن سے خطاب کرتے ہوئے کہا کہ سائنس ہمیں طاقت، فلسفہ بصیرت اور اخلاقیات درست سمت دکھاتی ہیں۔ تحقیق کا مقصد محض زندگی کو سمجھنا نہیں بلکہ اسے بہتر بنانا اور فطرت سے ہم آہنگ رکھنا ہے۔ انہوں نے کہا کہ سبز ٹیکنالوجی اور موسمیاتی تبدیلی پر مبنی یہ کانفرنس طلبہ و محققین کے لیے انتہائی مفید علمی موقع ہے۔ڈاکٹر سید عبدالخالق جان نے افتتاحی سیشن سے خطاب کرتے ہوئے کانفرنس کی اہمیت اور ضرورت پر تفصیلی گفتگو کی۔ انہوں نے کہا کہ موسمیاتی تبدیلی آج ایک عالمی حقیقت ہے، جس کے اثرات خوراک، پانی، صحت اور معیشت پر مرتب ہو رہے ہیں۔ حیاتیاتی ٹیکنالوجی کے پائیدار حل، علمی تحقیق، پالیسی سازی اور عوامی آگاہی کے ذریعے ہی ان چیلنجز کا مؤثر مقابلہ کیا جا سکتا ہے۔کانفرنس کے معاون آرگنائزر ڈاکٹر اللہ دتہ نے تمام شرکاء کا شکریہ ادا کیا اور کانفرنس کے دور رس نتائج پر گفتگو کرتے ہوئے امید ظاہر کی کہ اس علمی اجتماع سے تحقیقی تعاون، جدت اور پائیدار ماحولیاتی حکمتِ عملی کو فروغ ملے گا۔کانفرنس کے پہلے دن عبدالولی خان یونیورسٹی مردان کے پروفیسر ڈاکٹر ایاز احمد، زرعی یونیورسٹی پشاور کے پروفیسر ڈاکٹر شہنشاہ، ایشین فیڈریشن آف بائیوٹیکنالوجی کے سیکریٹری جنرل پروفیسر ڈاکٹر محمد عامر محمود، یونیورسٹی آف سوات کے پروفیسر ڈاکٹر فضل اکبر، ڈائریکٹر بزنس انکیوبیشن سنٹر یونیورسٹی آف ایگریکلچر پشاور کے پروفیسرڈاکٹر محمد نعمان احمد، پاکستان انسٹیوٹ اف انجنیئرنگ اینڈ اپلائڈ ساینسز پروفیسر ڈاکٹر طارق یاسین جبکہ اٹلی کے پروفیسر ڈاکٹر Gianluca Viscusi، کوبے یونیورسٹی جاپان کے پروفیسر ڈاکٹر Flemon Jalu اور چین کے پروفیسر ڈاکٹر Yuan Yuan نے اپنی تحقیقاتی نتائج اور عملی تجربات شیئر کیے۔ مقررین نے سبز حیاتیاتی ٹیکنالوجی، موسمیاتی تبدیلی کے اثرات، پائیدار زراعت، خوراک کے تحفظ اور ماحولیاتی بحالی پر روشنی ڈالی اور طلبہ کو متعلقہ موضوع پر انتہائی مفید معلومات فراہم کیں۔ شرکاء کو سوالات کے لیے اوپن فورم بھی مہیا کیا گیا۔کانفرنس کے پہلے دن کے اختتام پر مہمانوں کو اعزازی شیلڈز اور سووینئر پیش کیے گئے۔ کانفرنس کا دوسرا روز بھی علمی نشستوں، تحقیقی پیشکشوں اور سفارشات پر مبنی مباحثوں پر مشتمل ہے۔