پاکستان

 ثمرباغ میں سرکاری سڑکوں کی پیمائش اور تجاوزات کے خاتمے کا فیصلہ، اسسٹنٹ کمشنر کی سی اینڈ ڈبلیو حکام سے ملاقات

نومبر 16, 2026 • Press Release

جندول (لیاقت سیماب درانی) ضلع دیر پائین کی تحصیل ثمرباغ میں سرکاری سڑکوں پر قائم تجاوزات کے خاتمے اور ٹریفک کی روانی بہتر بنانے کے لیے اسسٹنٹ کمشنر محمد ایاز نے سی اینڈ ڈبلیو (C&W) ہائی ویز سب ڈویژن ثمرباغ کے ایس ڈی او سے اہم ملاقات کی۔

اس موقع پر منعقدہ اجلاس میں سی اینڈ ڈبلیو کے زیرانتظام سڑکوں کی اصل سرکاری چوڑائی کی پیمائش، حد بندی اور سڑکوں کے اطراف قائم غیر قانونی تجاوزات کے خاتمے سے متعلق امور پر تفصیلی تبادلہ خیال کیا گیا۔

اجلاس میں اتفاق کیا گیا کہ متعلقہ محکمے اور انتظامیہ مشترکہ طور پر سڑکوں کی سرکاری حدود کی نشاندہی اور پیمائش کا عمل جلد مکمل کریں گے، جس کے بعد غیر قانونی تجاوزات کے خلاف بلاامتیاز کارروائی عمل میں لائی جائے گی۔

اسسٹنٹ کمشنر محمد ایاز کی جانب سے واضح کیا گیا کہ سرکاری سڑکوں اور اراضی پر غیر قانونی قبضے برداشت نہیں کیے جائیں گے اور خلاف ورزی کرنے والوں کے خلاف قانون کے مطابق کارروائی کی جائے گی۔

عوامی حلقوں کا کہنا ہے کہ سڑکوں کی درست پیمائش اور تجاوزات کے خاتمے سے نہ صرف ٹریفک کی روانی بہتر ہوگی بلکہ بازاروں میں پیدل چلنے والوں اور مسافروں کو بھی سہولت میسر آئے گی۔ تاہم شہریوں نے مطالبہ کیا ہے کہ کارروائی تمام علاقوں میں یکساں اور بلاامتیاز ہونی چاہیے تاکہ کسی کے ساتھ ناانصافی نہ ہو۔