پاکستان

ملاکنڈ ڈویژن میں امن و امان کی صورتحال تسلی بخش ہے، عوام کا پولیس پر اعتماد برقرار ہے، آر پی او زاہد نواز

نومبر 16, 2026 • Press Release

سوات (بیورو رپورٹ) ریجنل پولیس آفیسر ملاکنڈ ڈویژن زاہد نواز نے کہا ہے کہ ملاکنڈ ڈویژن میں امن و امان کی صورتحال تسلی بخش ہے اور عوام کا پولیس پر اعتماد برقرار ہے۔ پولیس عوام کے جان و مال کے تحفظ، امن و امان کے قیام اور عوامی مسائل کے فوری حل کے لیے عوام دوست ماحول میں فرائض انجام دے رہی ہے۔ ان خیالات کا اظہار انہوں نے ریجنل انفارمیشن آفیسر سوات خالد رحمان وزیر سے اپنے دفتر میں ملاقات کے دوران گفتگو کرتے ہوئے کیا۔ آر پی او زاہد نواز نے کہا کہ پولیس اور عوام کے درمیان باہمی اعتماد، تعاون اور مؤثر رابطے کو مزید مستحکم بنانے کے لیے عملی اقدامات کیے جا رہے ہیں۔ ملاکنڈ ڈویژن کے تمام تھانوں میں عوام کی سہولت اور رہنمائی کے لیے مددگار پولیس اہلکار تعینات کیے گئے ہیں، جو تھانوں میں آنے والے سائلین کی رہنمائی، شکایات کے اندراج اور متعلقہ امور میں معاونت فراہم کر رہے ہیں۔ انہوں نے کہا کہ ان اہلکاروں کو پیشہ ورانہ مہارت، خوش اخلاقی اور خدمت کے جذبے کے تحت فرائض انجام دینے کی ہدایت کی گئی ہے۔ تھانوں میں آنے والے ہر شہری کے ساتھ عزت و احترام سے پیش آنا پولیس کی بنیادی ذمہ داری ہے اور کسی بھی سائل کو غیر ضروری انتظار، مشکلات یا نامناسب رویے کا سامنا نہیں ہونا چاہیے۔ پولیس افسران اور اہلکاروں کو عوامی شکایات ترجیحی بنیادوں پر سننے اور ان کے فوری ازالے کے لیے مؤثر اقدامات کرنے کی ہدایت کی گئی ہے۔ آر پی او نے اس عزم کا اظہار کیا کہ ملاکنڈ ڈویژن میں امن و امان کے قیام، جرائم کی روک تھام، قانون کی بالادستی اور عوام کے جان و مال کے تحفظ کے لیے پولیس تمام تر صلاحیتیں بروئے کار لاتی رہے گی۔ ان کا کہنا تھا کہ پولیس کا مقصد صرف قانون کا نفاذ نہیں بلکہ عوام کو تحفظ، سہولت اور انصاف کی فراہمی میں مؤثر کردار ادا کرنا بھی ہے۔ ملاقات کے دوران محکمہ پولیس اور محکمہ اطلاعات کے درمیان باہمی تعاون، عوامی آگاہی، پولیس کی مثبت کارکردگی کی تشہیر اور عوام تک مستند معلومات کی بروقت فراہمی کے حوالے سے بھی تفصیلی تبادلہ خیال کیا گیا، جبکہ دونوں محکموں کے درمیان رابطوں اور تعاون کو مزید مؤثر بنانے پر اتفاق کیا گیا۔
۔۔۔