مینگورہ امانکوٹ میں 21 سالہ شادی شدہ خاتون مبینہ طور پر زہریلی دوا کھانے سے جاں بحق

سوات (بیورورپورٹ) مینگورہ کے علاقے امانکوٹ میں 21 سالہ شادی شدہ خاتون مبینہ طور پر زہریلی دوا کھانے سے جاں بحق ہوگئی، واقعے کو خودکشی یا قتل قرار دینے کے حوالے سے پولیس نے ابتدائی رپورٹ درج کرکے تحقیقات شروع کردی ہیں۔ پولیس کے مطابق مسماۃ (ن) زوجہ تیمور کو طبیعت خراب ہونے پر سیدو شریف اسپتال منتقل کیا گیا، جہاں ڈاکٹروں نے ان کی موت کی تصدیق کردی۔ متوفیہ کی والدہ نے پولیس کو بیان دیتے ہوئے بتایا کہ ان کی 21 سالہ بیٹی کی شادی تین سال قبل امانکوٹ کے رہائشی تیمور سے ہوئی تھی، تاہم گزشتہ کئی ماہ سے میاں بیوی کے درمیان تعلقات کشیدہ تھے اور ان کی بیٹی ناراض ہوکر میکے بھی آگئی تھی۔ بعدازاں جرگے کے ذریعے صلح ہونے پر وہ واپس سسرال چلی گئی تھی۔ متوفیہ کی والدہ کے مطابق انہیں معلوم نہیں کہ ان کی بیٹی نے خود زہریلی دوا کھا کر خودکشی کی یا اسے زہر دے کر قتل کیا گیا۔ پولیس نے واقعے کی ابتدائی رپورٹ درج کرکے مختلف پہلوؤں سے تحقیقات شروع کردی ہیں۔
۔۔۔۔