پاکستان

معیار بازار میں انتظامیہ کی حد بندی پر تاجروں کا تاریخی تعاون، تجاوزات خود ہٹا دیں

نومبر 22, 2026 • Press Release

ثمرباغ(بیورو رپورٹ عمران خان شاہیخیل) معیار بازار میں تجاوزات کے خاتمے کے لیے انتظامیہ کی جانب سے کی گئی حد بندی کے بعد ایک خوشگوار اور حوصلہ افزا منظر سامنے آیا ہے، جہاں دکانداروں اور جائیداد مالکان نے کسی دباؤ یا زبردستی کے بغیر اپنی مدد آپ کے تحت رضاکارانہ طور پر تجاوزات ہٹانا شروع کر دی ہیں۔

ایڈیشنل اسسٹنٹ کمشنر ثمرباغ سعید اللہ نے معیار بازار کا تفصیلی دورہ کیا، دورے کا بنیادی مقصد بازار میں جاری تجاوزات کے خلاف آپریشن اور صفائی ستھرائی کی صورتحال کا جائزہ لینا تھا۔ انتظامیہ کی جانب سے بازار میں تجاوزات کے خاتمے کے لیے حد بندی اور نشان دہی کا عمل پہلے ہی مکمل کر لیا گیا تھا تاکہ سڑکوں اور گزرگاہوں کو کشادہ کیا جا سکے اور عوام کو ٹریفک کی روانی میں پیش آنے والی مشکلات سے نجات دلائی جا سکے۔

دورے کے دوران ایڈیشنل اسسٹنٹ کمشنر نے دیکھا کہ دکاندار حضرات اور مالکان انتظامیہ کی حد بندی کا مکمل احترام کرتے ہوئے خود ہی تجاوزات ہٹانے میں مصروف ہیں، اس منظر کو دیکھ کر انہوں نے تاجر برادری کے اس ذمہ دارانہ رویے کو سراہا اور اسے انتہائی احسن اور قابل تقلید اقدام قرار دیا۔

ایڈیشنل اسسٹنٹ کمشنر سعید اللہ نے اس موقع پر گفتگو کرتے ہوئے کہا کہ عوامی تعاون کے بغیر کوئی بھی مہم کامیاب نہیں ہو سکتی، جب تاجر برادری خود آگے بڑھ کر انتظامیہ کے ساتھ تعاون کرے گی تو بازاروں کی خوبصورتی بحال ہوگی اور ٹریفک کے دیرینہ مسائل پر مستقل قابو پایا جا سکے گا۔

شہریوں نے بھی تاجروں کے اس اقدام کو خوش آئند قرار دیتے ہوئے امید ظاہر کی ہے کہ معیار بازار کی یہ مثال پورے ضلع کے دیگر بازاروں کے لیے مشعل راہ ثابت ہوگی اور آنے والے دنوں میں بازار مزید صاف ستھرا، کشادہ اور منظم نظر آئے گا۔