شینجئی منڈہ میں موت کے سائے تلے پڑھتے معصوم بچے، سکول کی گرتی دیوار نے سب کو پریشان کر دیا

ثمرباغ ( بیورو رپورٹ) شینجئی منڈہ کے سرکاری پرائمری سکول میں اس وقت کتابوں سے زیادہ خوف پڑھایا جا رہا ہے۔ سکول کی ایک دیوار اس قدر بوسیدہ اور کمزور ہو چکی ہے کہ وہ کسی بھی لمحے زمین بوس ہو سکتی ہے، اور اس کے نیچے بیٹھے معصوم بچے ہر لمحہ ایک انجانے خطرے میں گھرے رہتے ہیں۔

سکول میں داخل ہوتے ہی پہلی نظر اس جھکی ہوئی، جگہ جگہ سے ٹوٹی ہوئی دیوار پر پڑتی ہے۔ اس کی اینٹیں اپنی جگہ سے ہل چکی ہیں، پلستر جھڑ چکا ہے اور نیچے سے بنیادیں بھی کمزور دکھائی دیتی ہیں۔ بارش ہو یا تیز ہوا، دیوار کا خوف مزید بڑھ جاتا ہے۔ اساتذہ بچوں کو بار بار اس طرف جانے سے روکتے ہیں، مگر چھوٹے بچوں کو کب تک روکا جا سکتا ہے۔

والدین کا کہنا ہے کہ وہ ہر روز اپنے بچوں کو سکول بھیجتے ہوئے دل پر پتھر رکھتے ہیں۔ ایک والد نے نمائندے سے گفتگو کرتے ہوئے کہا کہ ہمارے بچے یہاں خواب لے کر آتے ہیں، مگر دیوار دیکھ کر ہمارے خواب خوف میں بدل جاتے ہیں۔ ہم نے کئی بار متعلقہ حکام کو آگاہ کیا، مگر اب تک صرف تسلیاں ملی ہیں، عملی کام کچھ نہیں ہوا۔

علاقہ عمائدین نے بھی اس صورتحال پر شدید تشویش کا اظہار کیا ہے۔ ان کا کہنا ہے کہ شینجئی منڈہ جیسے دور افتادہ علاقے میں یہ سکول بچوں کے مستقبل کی واحد امید ہے۔ اگر یہاں کوئی حادثہ ہو گیا تو اس کا ذمہ دار کون ہو گا۔ کیا ہم کسی بڑے سانحے کا انتظار کریں گے، پھر جا کر دیوار بنائیں گے۔

مقامی لوگوں نے محکمہ تعلیم لوئر دیر، ضلعی انتظامیہ اور منتخب نمائندوں سے پرزور مطالبہ کیا ہے کہ فوری طور پر سکول کا دورہ کیا جائے، دیوار کی مرمت نہیں بلکہ اس کی ازسرنو مضبوط تعمیر کرائی جائے، اور سکول کی عمارت کا مکمل جائزہ لیا جائے۔ ان کا کہنا ہے کہ بچوں کی زندگیاں فائلوں اور رسمی کارروائیوں سے زیادہ قیمتی ہیں۔

اہل علاقہ نے خبردار کیا ہے کہ اگر بروقت اقدامات نہ کیے گئے اور خدا نخواستہ کوئی ناخوشگوار واقعہ پیش آیا تو اس کی تمام تر ذمہ داری متعلقہ محکمہ اور غفلت برتنے والے حکام پر ہو گی۔ اب وقت آ گیا ہے کہ وعدوں کے بجائے کام کیا جائے، تاکہ شینجئی منڈہ کے بچے خوف کے بجائے اعتماد کے ساتھ تعلیم حاصل کر سکیں۔