کیٹیگری ڈی ہسپتال معیار میں فائر سیفٹی ٹریننگ

ریسکیو 1122 نے عملے کو ہنگامی حالات سے نمٹنے کا گر سکھا دیا

ثمرباغ (بیورو رپورٹ عمران خان سے ) ضلع دیر لوئر میں ریسکیو 1122 کی ٹریننگ ونگ ایک بار پھر میدان میں آگئی ہے۔ ڈسٹرکٹ ایمرجنسی آفیسر ثناء اللہ کی ہدایات پر ٹیم نے کیٹیگری ڈی ہسپتال معیار میں فائر سیفٹی کے حوالے سے خصوصی تربیتی سیشن کا انعقاد کیا، جس میں ہسپتال کے طبی و معاون عملے نے بھرپور شرکت کی۔

تربیتی سیشن کا آغاز آگ لگنے کی وجوہات اور اس سے بچاؤ کے بنیادی اصولوں سے ہوا۔ ریسکیو اہلکاروں نے عملے کو سمجھایا کہ ہنگامی صورتحال میں گھبرانے کے بجائے فوری اور درست فیصلہ ہی سب سے بڑا بچاؤ ہے۔ اس دوران آگ بجھانے والے آلات کے درست استعمال کا عملی مظاہرہ بھی کیا گیا، جس میں عملے نے خود حصہ لے کر آلات چلانے کی مشق کی۔

ٹرینرز نے ہسپتال کے عملے کو بتایا کہ آگ لگنے کی صورت میں مریضوں کو محفوظ مقام پر منتقل کرنا، بجلی کی فراہمی منقطع کرنا، دھوئیں سے بچاؤ اور بروقت ریسکیو 1122 کو اطلاع دینا کس قدر ضروری ہے۔ عملے کو ہنگامی راستوں کے استعمال اور مریضوں میں خوف و ہراس پھیلنے سے روکنے کے طریقے بھی سکھائے گئے۔

اس تربیتی سرگرمی کا بنیادی مقصد طبی عملے کی استعداد کار میں اضافہ کرنا اور ہسپتال میں ایک محفوظ ماحول کو فروغ دینا ہے تاکہ کسی بھی ناگہانی صورتحال میں بروقت اور مؤثر ردعمل یقینی بنایا جا سکے۔

اس موقع پر ریسکیو حکام کا کہنا تھا کہ ہسپتال جیسے حساس مقامات پر عملے کا تربیت یافتہ ہونا ناگزیر ہے، کیونکہ یہاں ذرا سی غفلت بھی بڑے نقصان کا سبب بن سکتی ہے۔ ریسکیو 1122 کا مشن صرف حادثات پر پہنچنا نہیں، بلکہ حادثات سے پہلے عوام کو تیار کرنا بھی ہے۔

ہسپتال انتظامیہ اور عملے نے ریسکیو 1122 کی اس کاوش کو سراہا اور امید ظاہر کی کہ اس طرح کے تربیتی سیشن مستقبل میں بھی جاری رہیں گے تاکہ ہسپتال میں مریضوں اور عملے کی حفاظت مزید یقینی بنائی جا سکے۔