سوات میں کھلی نالیوں کو جدید فرانسیسی ڈرین میں تبدیل کرنے کا منصوبہ شروع

سیدو شریف میں 300 فٹ نالی کو ماحول دوست نظام میں تبدیل کیا جائے گا

سوات (بیورو رپورٹ) کمشنر ملاکنڈ ڈویژن کی سینیٹیشن اپ لفٹ پالیسی کے تحت ڈبلیو ایس ایس سی سوات نے صفائی اور نکاسی آب کے نظام کو جدید خطوط پر استوار کرنے کے لیے ایک اہم اور ماحول دوست پائلٹ منصوبے کا آغاز کردیا ہے، جس کے تحت سیدو شریف میں 300 فٹ کھلی نالی کو جدید فرانسیسی ڈرین (French Drain) میں تبدیل کیا جا رہا ہے۔ اس جدید نظام کے ذریعے بارش اور گندے پانی کو فلٹرنگ کے مختلف مراحل سے گزار کر زیرِ زمین جذب یا مناسب طریقے سے خارج کیا جائے گا۔ منصوبے سے کھلی نالیوں میں کچرا جمع ہونے، بدبو پھیلنے، مچھروں اور جراثیم کی افزائش سمیت دیگر ماحولیاتی اور صحت کے مسائل میں کمی لانے میں مدد ملے گی۔ اس پائلٹ منصوبے کا بنیادی مقصد روایتی کھلی نالیوں کے متبادل کے طور پر جدید اور ماحول دوست نظام متعارف کرانا، صفائی کے معیار کو بہتر بنانا اور شہریوں کو صاف، صحت مند اور بہتر ماحول فراہم کرنا ہے۔ اس سلسلے میں کمشنر ملاکنڈ ڈویژن نے چیف ایگزیکٹو آفیسر ڈبلیو ایس ایس سی سوات کے ہمراہ منصوبے کے مقام کا دورہ کیا، جہاں انہیں منصوبے کے طریقہ کار اور افادیت کے حوالے سے تفصیلی بریفنگ دی گئی۔ کمشنر ملاکنڈ ڈویژن نے اس جدید اور ماحول دوست اقدام کو سراہتے ہوئے ڈبلیو ایس ایس سی سوات کی کاوشوں کو قابلِ تحسین قرار دیا۔