اپر چترال میں آغا خان ہیلتھ سروس کے زیر اہتمام ماں اور بچے کی صحت سے متعلق آگاہی کیمپ کا انعقاد

چترال (سیدنذیرحسین شاہ نذیر) آغاخان ہیلتھ سروس چترال کے سنٹرل ایشیاء اسٹرنتھیننگ انیشی ایٹو (CASI) پراجیکٹ کے زیر اہتمام اور مالی معاونت سے اپر چترال کے علاقوں چونیچ، مستوج اور بریپ میں چھ روزہ ایڈولسنٹ (نوجوانوں) آگاہی کیمپ کا انعقاد کیا گیا، جس میں غذائی قلت، غیر متوازن خوراک، بچوں کو دودھ پلانے کی اہمیت، ماں اور بچے کی صحت، چھاتی کے سرطان اور بچوں کی پیدائش میں مناسب وقفے سمیت مختلف اہم موضوعات پر تفصیلی آگاہی فراہم کی گئی۔
اس موقع پر کاسی پراجیکٹ کی نیوٹریشن کونسلرز شہنلا حسین، تسلیم اقبال،ایل ایچ ڈبلیو کوآرڈینیٹر اپر چترال، CASI پراجیکٹ اپر چترال کے ڈسٹرکٹ کوآرڈینیٹر مقبول علی شاہ، لوئر چترال کے اشفاق احمد اور دیگر مقررین نے شرکاء سے خطاب کرتے ہوئے کہا کہ ماں کا دودھ بچے کی صحت، جسمانی نشوونما اور بیماریوں کے خلاف قوت مدافعت پیدا کرنے کا قدرتی اور بہترین ذریعہ ہے۔ ماں کے دودھ میں بچے کی نشوونما کے لیے ضروری پانی، توانائی، پروٹین، کیلشیم، آئرن اور مختلف وٹامنز موجود ہوتے ہیں۔ یہی وجہ ہے کہ ماہرین صحت پیدائش سے لے کر پہلے چھ ماہ تک بچے کو صرف ماں کا دودھ پلانے کی تاکید کرتے ہیں، جبکہ چھ ماہ مکمل ہونے کے بعد ماں کے دودھ کے ساتھ نرم اور اضافی غذائیں بھی شروع کرنی چاہئیں۔
مقررین نے کہا کہ ماں اور بچے کی صحت کا براہ راست تعلق بچوں کی پیدائش میں مناسب وقفے سے ہے۔ اس مقصد کے لیے خاندانی منصوبہ بندی کے طریقوں پر عمل کرنا ضروری ہے۔ بالخصوص دورافتادہ اور پسماندہ علاقوں میں تولیدی صحت کے حوالے سے خواتین کو متعدد مشکلات کا سامنا ہے۔ بچوں کی پیدائش میں مناسب وقفہ نہ ہونے کی صورت میں ماں اور بچے دونوں کی صحت کو خطرات لاحق ہوسکتے ہیں۔ مناسب وقفے سے ماں کو اپنی صحت بحال کرنے کا موقع ملتا ہے، جبکہ بچوں کو بہتر توجہ، نگہداشت اور پرورش میسر آتی ہے۔
پراجیکٹ منیجر نگار علی نے کہا کہ غذائی قلت کے خاتمے اور غذائی کمی کا شکار بچوں کی شرح اموات میں کمی لانے کے لیے آغاخان ہیلتھ سروس چترال کا CASI پراجیکٹ گزشتہ کئی سالوں سے سرگرم عمل ہے۔ اس سلسلے میں نومولود بچوں، دودھ پلانے والی ماؤں اور حاملہ خواتین کی غذائی ضروریات کے حوالے سے زیادہ سے زیادہ آگاہی فراہم کرنے کی ضرورت ہے۔ حاملہ خواتین اور نومولود بچوں کی ماؤں کو متوازن اور صحت بخش غذا کے استعمال کی ترغیب دی جا رہی ہے تاکہ صحت مند معاشرے کی تشکیل ممکن ہوسکے۔
انہوں نے کہا کہ غذائی قلت کے شکار بچوں کی جسمانی نشوونما متاثر ہونے کے ساتھ ساتھ ان کی ذہنی صلاحیتیں بھی پوری طرح پروان نہیں چڑھ پاتیں، جس کے باعث وہ تعلیم اور زندگی کے دیگر شعبوں میں صحت مند بچوں کے مقابلے میں پیچھے رہ جاتے ہیں۔ غذائیت کی اہمیت اجاگر کرنے اور لوگوں کے رویوں میں مثبت تبدیلی لانے کے لیے معاشرے کے تمام طبقات کو اپنا کردار ادا کرنا ہوگا۔
آگاہی سیشن کے دوران خواتین میں چھاتی کے سرطان کے حوالے سے بھی تفصیلی گفتگو کی گئی۔ مقررین نے کہا کہ چھاتی کا سرطان خواتین میں تیزی سے پھیلنے والی بیماریوں میں شامل ہے اور بروقت تشخیص نہ ہونے کی صورت میں جان لیوا ثابت ہوسکتا ہے۔ تاہم ابتدائی مرحلے میں تشخیص اور مناسب علاج کے ذریعے بڑی تعداد میں خواتین کی زندگیاں بچائی جاسکتی ہیں۔ انہوں نے کہا کہ اس مرض کے بارے میں شعور کی کمی خصوصاً دورافتادہ علاقوں کی خواتین کے لیے ایک بڑا مسئلہ ہے۔ خواتین کو چاہیے کہ وہ باقاعدگی سے اپنا معائنہ کریں اور کسی غیر معمولی تبدیلی یا علامت کی صورت میں فوری طور پر ڈاکٹر سے رجوع کریں۔ اس حوالے سے مردوں اور خواتین دونوں کو اپنا کردار ادا کرنا چاہیے تاکہ اس مہلک مرض کی بروقت تشخیص اور علاج ممکن بنایا جاسکے۔
پروگرام کے اختتام پر شرکاء اور عمائدین علاقہ نے اس نوعیت کے آگاہی پروگراموں کے انعقاد پر آغاخان ہیلتھ سروس چترال اور CASI پراجیکٹ کے ذمہ داران کو خراج تحسین پیش کیا اور امید ظاہر کی کہ مستقبل میں بھی ایسے مفید پروگراموں کا سلسلہ جاری رکھا جائے گا۔ چھ روزہ آگاہی کیمپ میں سینکڑوں کی تعداد میں خواتین، مردوں اور طلبہ و طالبات نے شرکت کی، جبکہ شرکاء نے متعلقہ ماہرین سے مختلف سوالات بھی کیے جن کے تفصیلی جوابات دیے گئے۔