خوازہ خیلہ میں شادی سے انکار پر نوجوان لڑکی قتل، ملزم اسلحہ سمیت گرفتار

سوات (بیورو رپورٹ) تحصیل خوازہ خیلہ کے علاقے چینکولئی میں شادی سے انکار پر نوجوان لڑکی کو فائرنگ کرکے قتل کردیا گیا۔ ایس پی انوسٹی گیشن برسوات شوکت خان کے مطابق ملزم نصر ولد بہروز سکنہ چینکولئی نے شادی سے انکار پر 21 سالہ لڑکی مسماۃ(ج) دختر محمد اعظم کو فائرنگ کرکے قتل کیا۔ پولیس نے اطلاع ملتے ہی موقع پر پہنچ کر لاش کو پوسٹ مارٹم کے لئے اسپتال منتقل کردیا اور فوری کارروائی کرتے ہوئے مبینہ ملزم نصر کو واردات کے صرف دو گھنٹے کے اندر گرفتار کرلیا اور آلہ قتل بھی برآمد کرلیا۔ انہوں نے کہاکہ واقعے کی مزید تفتیش جاری ہے۔