سوات (بیورو رپورٹ) ڈپٹی کمشنر سوات سلیم جان مروت کی خصوصی ہدایت پر ایڈیشنل اسسٹنٹ کمشنر بابوزئی سید عمران علی شاہ نے ڈسٹرکٹ جیل سوات سیدو شریف کا دورہ کیا تاکہ قیدیوں کو فراہم کردہ سہولیات کا جائزہ لیا جا سکے۔ دورے کے دوران ایڈیشنل اسسٹنٹ کمشنر نے جیل کے مختلف حصوں کا تفصیلی معائنہ کیا اور قیدیوں کو دی جانے والی بنیادی سہولیات، خوراک، صحت و صفائی کے معیار اور مجموعی انتظامات کا جائزہ لیا۔ انہوں نے جیل انتظامیہ کو ہدایت کی کہ تمام قیدیوں کے انسانی حقوق کا مکمل خیال رکھا جائے اور انہیں بنیادی ضروریات کی فراہمی میں کسی قسم کی کوتاہی برداشت نہ کی جائے۔ علاوہ ازیں، معمولی نوعیت کے جرم میں قید 7 ملزمان کی رہائی کے احکامات بھی جاری کیے گئے۔