سوات میں صوبائی وزیر ہاؤسنگ ڈاکٹر امجد علی کو نامعلوم افراد مبینہ طور پر اٹھا کر لے گئے

سوات (بیورورپورٹ) سوات میں صوبائی وزیر ہاؤسنگ ڈاکٹر امجد علی کو ان کے آبائی علاقے شموزئی میں واقع حجرے سے نامعلوم افراد مبینہ طور پر اٹھا کر اپنے ساتھ لے گئے۔ ذرائع کے مطابق صوبائی وزیر ڈاکٹر امجد علی گزشتہ رات اپنے حجرے میں موجود تھے کہ اس دوران متعدد نامعلوم افراد حجرے میں داخل ہوئے اور مبینہ طور پر انہیں اپنے ساتھ لے گئے۔ ڈاکٹر امجد علی کے سوشل میڈیا پیج پر بھی واقعے کی تصدیق کرتے ہوئے الزام عائد کیا گیا ہے کہ نامعلوم افراد نے انہیں اٹھا کر لے جانے کے علاوہ حجرے میں توڑ پھوڑ بھی کی۔ واقعے کے حوالے سے پولیس کا کہنا ہے کہ تاحال ڈاکٹر امجد علی کے خاندان کی جانب سے قانونی کارروائی کے لیے کوئی درخواست موصول نہیں ہوئی. واضح رہے کہ اس سے قبل سوات سے رکن صوبائی اسمبلی سلطانی روم، سابق وفاقی وزیر مراد سعید کے سابق مشیر خورشید دادا اور رکن صوبائی اسمبلی فضل حکیم کے منیجر احسان عالم کو بھی نامعلوم افراد کی جانب سے اٹھا کر لے جانے کے واقعات سامنے آچکے ہیں، جبکہ رکن قومی اسمبلی ڈاکٹر امجد علی کے گھر پر بھی چھاپہ مارا گیا تھا۔
۔۔۔۔