رضاکارانہ خدمات، خون کے عطیے اور تھیلیسیمیا سے متعلق آگاہی سیشن کا انعقاد
ضلعی انتظامیہ دیر پائین، ڈسٹرکٹ یوتھ آفس اور بلڈ چین آف پاکستان کے باہمی اشتراک سے نوجوانوں میں رضاکارانہ خدمات (Volunteerism)، خون کے عطیے (Blood Donation) اور تھیلیسیمیا (Thalassemia) کے حوالے سے شعور و آگاہی پیدا کرنے کے لیے ایک خصوصی آگاہی سیشن کا انعقاد GIBS کالج چکدرہ میں کیا گیا۔ سیشن میں ممتاز ماہرِ تعلیم و صحت پروفیسر ڈاکٹر جمیل انور عباسی نے بطور ریسورس پرسن شرکت کی اور نوجوانوں کو مختلف موضوعات پر مفصل لیکچر دیا۔ اپنے خطاب میں پروفیسر ڈاکٹر جمیل انور عباسی نے رضاکارانہ خدمات کی اہمیت پر روشنی ڈالتے ہوئے کہا کہ رضاکارانہ سرگرمیاں کسی بھی معاشرے میں سماجی ترقی، باہمی تعاون اور انسانی ہمدردی کے فروغ کا مؤثر ذریعہ ہیں۔ نوجوانوں کو چاہیے کہ وہ اپنی صلاحیتوں، وقت اور توانائی کو معاشرے کی بہتری اور انسانیت کی خدمت کے لیے وقف کریں۔ انہوں نے اس بات پر زور دیا کہ رضاکارانہ خدمات کے ذریعے نوجوان نہ صرف دوسروں کی زندگیوں میں مثبت تبدیلی لا سکتے ہیں بلکہ اپنی شخصیت میں قیادت، احساسِ ذمہ داری، برداشت اور اجتماعی شعور جیسی خوبیاں بھی پیدا کر سکتے ہیں۔ خون کے عطیے (Blood Donation) کے حوالے سے گفتگو کرتے ہوئے انہوں نے نوجوانوں میں پائے جانے والے مختلف خدشات، غلط فہمیوں اور توہمات کا تفصیلی جائزہ لیا۔ انہوں نے خون کے عطیے سے متعلق سائنسی اور طبی حقائق بیان کرتے ہوئے واضح کیا کہ مستند طبی اصولوں اور احتیاطی تدابیر کے مطابق صحت مند افراد کا خون عطیہ کرنا ایک محفوظ اور قابلِ تحسین انسانی عمل ہے۔ انہوں نے کہا کہ خون کا ایک عطیہ کسی ضرورت مند مریض کے لیے زندگی کی نئی امید بن سکتا ہے، لہٰذا نوجوانوں کو اس عظیم انسانی خدمت میں اپنا کردار ادا کرنا چاہیے۔ تھیلیسیمیا کے موضوع پر اظہارِ خیال کرتے ہوئے انہوں نے اس مرض کی نوعیت، اس کے اسباب، مریضوں کو درپیش مشکلات اور اس سے بچاؤ کے لیے احتیاطی تدابیر پر روشنی ڈالی۔ انہوں نے بروقت تشخیص، شادی سے قبل ضروری طبی مشاورت اور تھیلیسیمیا اسکریننگ کی اہمیت اجاگر کرتے ہوئے نوجوانوں کو تلقین کی کہ وہ اس مرض کے حوالے سے اپنے خاندانوں اور معاشرے میں زیادہ سے زیادہ آگاہی پھیلائیں۔ اس موقع پر GIBs کالج کے چیف ایگزیکٹو آفیسر ظہور عالم، ڈائریکٹر عرفان اللہ، پرنسپل محمد اقبال، بلڈ چین کی ممبر طوبیٰ گل اور ملاکنڈ ڈویژن کے صدر حسنین خان نے بھی شرکت کی اور اپنے خیالات کا اظہار کیا۔ مقررین نے رضاکارانہ خدمات، خون کے عطیے اور تھیلیسیمیا سے متعلق آگاہی کو وقت کی اہم ضرورت قرار دیتے ہوئے نوجوانوں کے کردار کو سراہا۔ انہوں نے کہا کہ ایک باشعور اور ذمہ دار نوجوان نسل ہی معاشرے میں خدمتِ خلق، انسانی ہمدردی اور اجتماعی فلاح کے جذبے کو فروغ دے سکتی ہے۔ تقریب کے اختتام پر رضاکارانہ خدمات اور فلاحی سرگرمیوں میں نمایاں کردار ادا کرنے والے رضاکاروں میں توصیفی اسناد تقسیم کی گئیں، جبکہ معزز مہمانوں اور مقررین کو ان کی خدمات اور شرکت کے اعتراف میں اعزازی شیلڈز بھی پیش کی گئیں۔ یہ آگاہی سیشن نوجوانوں کو معاشرتی ذمہ داریوں سے روشناس کرانے، رضاکارانہ خدمات کے جذبے کو مضبوط بنانے، خون کے عطیے سے متعلق غلط فہمیوں کے خاتمے اور تھیلیسیمیا جیسے امراض کے حوالے سے مثبت شعور اجاگر کرنے کی ایک اہم کاوش تھی۔ ڈسٹرکٹ یوتھ آفس دیر پائین نوجوانوں کی مثبت تربیت، صلاحیتوں کے فروغ، سماجی خدمت اور معاشرے میں تعمیری تبدیلی کے لیے ضلعی انتظامیہ اور دیگر شراکت دار اداروں کے تعاون سے اپنی سرگرمیاں جاری رکھنے کے عزم کا اعادہ کرتا ہے۔