پاکستان

گورنمنٹ گرلز ڈگری کالج تیمرگرہ میں گندے نالے کی لیکیج، پینے کا پانی آلودہ، تعفن سے طالبات کا جینا محال

نومبر 17, 2026 • Press Release

متروک زرعی نالے کا رخ کالج کی جانب موڑ دیا گیا، ضلعی انتظامیہ فوری نوٹس لے کر اس عذاب سے نجات دلائے: کالج انتظامیہ کی اپیل

تیمرگرہ (اسماعیل انجم سے) گورنمنٹ گرلز ڈگری کالج تیمرگرہ کے قریب سے گزرنے والے گندے نالے کی لیکیج کے باعث غلیظ پانی کالج کی حدود میں داخل ہو گیا ہے، جس کے نتیجے میں نہ صرف کالج کے ٹیوب ویل کا پانی شدید آلودہ ہو چکا ہے بلکہ اٹھنے والی ناقابلِ برداشت بدبو نے طالبات اور تدریسی عملے کا جینا محال کر دیا ہے۔
تفصیلات کے مطابق، کالج کے قریب سے گزرنے والا یہ نالہ دراصل ایک متروک زرعی نالہ ہے جو اب صرف علاقے کی سیوریج کے لیے استعمال ہو رہا ہے۔ معلوم ہوا ہے کہ کچھ عرصہ قبل کسی نے اس گندے نالے کا رخ موڑ کر کالج کی طرف کر دیا تھا، جس کی وجہ سے اب نالے کا غلیظ پانی کالج کی قریبی دیوار سے رس کر (لیکیج کے ذریعے) براہ راست کالج کے اندر بہہ رہا ہے۔
اس افسوسناک صورتحال کے باعث کالج میں زیرِ تعلیم سینکڑوں طالبات کی صحت کو شدید خطرات لاحق ہو گئے ہیں۔ گندے پانی کی آمیزش سے کالج کے ٹیوب ویل کا پانی آلودہ ہو کر پینے کے قابل نہیں رہا اور مضرِ صحت بن چکا ہے۔ دوسری جانب ہر وقت پھیلی رہنے والی غلاظت اور شدید بدبو نے طالبات سمیت پوری کالج انتظامیہ کو ایک مستقل عذاب میں مبتلا کر رکھا ہے جس سے تدریسی و تعلیمی سرگرمیاں بھی بری طرح متاثر ہو رہی ہیں۔
گورنمنٹ گرلز ڈگری کالج کی انتظامیہ نے ڈپٹی کمشنر دیر لوئر، ضلعی انتظامیہ اور ٹی ایم اے تیمرگرہ حکام سے پرزور اپیل کی ہے کہ اس سنگین مسئلے کا فوری نوٹس لیا جائے۔ کالج انتظامیہ نے مطالبہ کیا ہے کہ نالے کا رخ فوری طور پر تبدیل کر کے لیکیج کو روکا جائے تاکہ طالبات اور اساتذہ کو آلودہ پانی اور تعفن کے اس دوہرے عذاب سے جلد از جلد نجات مل سکے۔