سوات میں کالے شیشوں والی گاڑیوں کے خلاف کارروائیاں تیز
سوات (بیورو رپورٹ) ریجنل پولیس آفیسر ملاکنڈ زاہد نواز مروت اور ڈسٹرکٹ پولیس آفیسر سوات محمد عمر خان کی ہدایات پر ایس پی ٹریفک وارڈن پولیس سوات پرویز خان نے سیکٹر سٹی کا دورہ کیا، جہاں انہوں نے مختلف شاہراہوں پر ٹریفک کی صورتحال کا جائزہ لیا اور اپنی براہِ راست نگرانی میں کالے شیشوں والی گاڑیوں کے خلاف کارروائیاں کیں۔ اس موقع پر انچارج سیکٹر سٹی سرفراز خان بھی ان کے ہمراہ تھے۔ ایس پی ٹریفک وارڈن پرویز خان نے کہا کہ قانون سے بالاتر کوئی نہیں، کالے شیشوں اور دیگر غیر قانونی سرگرمیوں میں ملوث گاڑیوں کے خلاف بلاامتیاز کارروائیاں جاری رہیں گی۔ انہوں نے ٹریفک افسران اور اہلکاروں کو ہدایت کی کہ قانون پر سختی سے عمل درآمد یقینی بنایا جائے اور خلاف ورزی کرنے والوں کے ساتھ کسی قسم کی رعایت نہ برتی جائے۔