پاکستان

سنسر بورڈ نے 1,454 فلموں، ٹریلرز اور اشتہارات کی منظوری دے کر ایک کروڑ 89 لاکھ 70 ہزار روپے آمدن حاصل کی

نومبر 18, 2026 • Press Release

اسلام آباد۔18نومبر (اے بی سی):سینٹرل بورڈ آف فلم سنسرز (سی بی ایف سی) نے جنوری 2021 سے ستمبر 2026 کے دوران 1,454 فلموں، ٹریلرز اور اشتہارات کو سرٹیفکیٹ جاری کیے، جس سے اس عرصے میں تقریباً ایک کروڑ 89 لاکھ 70 ہزار روپے کی آمدن حاصل ہوئی۔ویلتھ پاکستان کو دستیاب سرکاری دستاویزات کے مطابق بورڈ نے غیر ملکی سفارتی مشنز کی جانب سے پیش کی گئی 94 فلموں اور دستاویزی فلموں کو بھی سرٹیفکیٹ جاری کیے، جو پاکستان میں کام کرنے والے بین الاقوامی سفارتی مشنز کو فلموں کی سرٹیفکیشن کی سہولیات فراہم کرنے میں اس کے کردار کو ظاہر کرتا ہے۔سالانہ سرٹیفکیشن کی تعداد میں مسلسل اضافہ ریکارڈ کیا گیا۔

سال 2021 میں 105 فلموں، ٹریلرز اور اشتہارات کو سرٹیفکیٹ جاری کیے گئے، جبکہ 2022 میں یہ تعداد بڑھ کر 190، سال 2023 میں 242، سال 2024 میں 302 اور 2025 میں 320 تک پہنچ گئی۔جنوری سے ستمبر 2026 کے دوران بورڈ نے مزید 295 پروڈکشنز کو سرٹیفکیٹ جاری کیے۔سرٹیفکیشن کی سرگرمیوں سے حاصل ہونے والی آمدن بھی بڑھ کر 2021 کے تقریباً 11 لاکھ 70 ہزار روپے سے 2025 میں 45 لاکھ روپے تک پہنچ گئی۔بورڈ نے 2026 کے ابتدائی نو ماہ کے دوران مزید 37 لاکھ 60 ہزار روپے کی آمدن حاصل کی، جس کے بعد زیر جائزہ عرصے کی مجموعی آمدن ایک کروڑ 89 لاکھ 70 ہزار روپے ہو گئی۔

سرٹیفکیشن کے ریکارڈ میں 512 انگریزی زبان کی اور درآمد شدہ پروڈکشنز، 147 پاکستانی پروڈکشنز، 127 درآمد شدہ پنجابی پروڈکشنز اور غیر ملکی سفارتی مشنز کے ذریعے پیش کی گئی 94 پروڈکشنز شامل تھیں۔جدید خطوط پر استوار کرنے کے اقدامات کے تحت سینٹرل بورڈ آف فلم سنسرز نے 2024 میں پبلک سیکٹر ڈیولپمنٹ پروگرام (پی ایس ڈی پی) کے ذریعے اپنے پروجیکشن روم میں ڈیجیٹل سنیما پروجیکٹر (ڈی سی پی) نصب کیا۔اسی سال بورڈ کے اندر فلموں کی نمائش اور جانچ کے لیے ایک داخلی اسکریننگ سہولت بھی قائم کی گئی، تاکہ موشن پکچرز آرڈیننس 1979 کے تحت فلموں کی رازداری برقرار رکھنے کی قانونی ضرورت پوری کی جا سکے۔

دستاویزات میں مزید بتایا گیا ہے کہ موشن پکچرز آرڈیننس 1979 میں ترامیم 26 اکتوبر 2026 کو سینیٹ اور قومی اسمبلی سے منظور کی گئیں۔دریں اثنا، صوبوں میں فلم سنسرشپ کے طریقہ کار میں پائے جانے والے اختلافات دور کرنے کے لیے فلم سنسر بورڈز کی مشترکہ رابطہ کمیٹی بھی تشکیل دی گئی ہے۔اس اقدام کا مقصد مختلف سنسر بورڈز کے درمیان رابطہ کاری بہتر بنانا اور ایسے معاملات حل کرنا ہے، جن میں ایک بورڈ کی منظور کردہ فلم کو دوسرا بورڈ نمائش کے لیے غیر موزوں قرار دے دیتا ہے۔وزارت اطلاعات و نشریات کے تحت کام کرنے والے سینٹرل بورڈ آف فلم سنسرز میں بورڈ اراکین کی منظور شدہ تعداد 20 ہے، جبکہ اس وقت 19 اراکین موجود ہیں۔بورڈ کے ملازمین کی منظور شدہ تعداد 30 ہے، جبکہ اس کا مجموعی بجٹ 3 کروڑ 60 لاکھ روپے ہے۔

اس میں ملازمین سے متعلق اخراجات کے لیے 2 کروڑ 10 لاکھ روپے اور دیگر اخراجات کے لیے ایک کروڑ 50 لاکھ روپے مختص ہیں۔بورڈ کی ذمہ داریوں میں فلموں، دستاویزی فلموں اور ٹریلرز کی سرٹیفکیشن، سنسرشپ کے ضوابط پر عمل درآمد کی نگرانی اور غیر ملکی سفارتی مشنز کی جانب سے موصول ہونے والی سرٹیفکیشن کی درخواستوں پر کارروائی شامل ہے۔کارکردگی کے یہ اعدادوشمار بورڈ کی سرٹیفکیشن سرگرمیوں میں توسیع، آمدن میں اضافے اور اپنے انتظامی امور کو جدید بنانے کی کوششوں کی عکاسی کرتے ہیں۔ اس کے ساتھ فلم سنسرشپ کے متعلقہ اداروں کے درمیان رابطہ کاری بہتر بنانے کے لیے بھی اقدامات کیے جا رہے ہیں۔