ڈپٹی کمشنر سوات سلیم جان مروت کی زیرِ صدارت ضلعی انسدادِ ڈینگی و ریسپانس یونٹ کا اجلاس
انسدادی اقدامات اور عوامی آگاہی مہم مزید مؤثر بنانے کی ہدایت
سوات(بیورورپورٹ)ڈپٹی کمشنر سوات سلیم جان مروت کی زیرِ صدارت ضلعی انسدادِ ڈینگی و ریسپانس یونٹ کا اجلاس منعقد ہوا جس میں ضلع بھر میں ڈینگی کی موجودہ صورتِ حال، تدارک کے لیے جاری سرگرمیوں، متعلقہ محکموں کی کارکردگی اور گزشتہ اجلاس میں جاری کردہ ہدایات پر عمل درآمد کا تفصیلی جائزہ لیا گیا۔ڈسٹرکٹ ڈینگی فوکل پرسن و ڈپٹی ڈسٹرکٹ ہیلتھ آفیسر سوات ڈاکٹر فضل عارف نے اجلاس کو انسدادِ ڈینگی اقدامات، اب تک کی پیش رفت، حفاظتی انتظامات اور متعلقہ محکموں کی ذمہ داریوں کے حوالے سے تفصیلی بریفنگ دی۔ محکمہ صحت اور دیگر متعلقہ محکموں کے نمائندگان نے بھی ڈینگی کے پھیلاؤ کی روک تھام کے لیے جاری سرگرمیوں سے اجلاس کو آگاہ کیا۔اجلاس میں ایڈیشنل ڈپٹی کمشنر (ریلیف و ہیومن رائٹس) سوات نعمت اللہ اور تمام اسسٹنٹ کمشنرز, ٹی ایم ایز نمائندگان، جنرل مینیجر ڈبلیو ایس ایس سی سوات اور دیگر نے آن لائن ویڈیو لنک کے ذریعے شرکت کی۔ اجلاس میں محکمہ تعلیم (مردانہ و زنانہ)، سوشل ویلفیئر، سول ڈیفنس، انڈسٹریز اینڈ کنزیومر پروٹیکشن، لوکل گورنمنٹ، تحصیل میونسپل ایڈمنسٹریشنز اور پبلک ہیلتھ انجینئرنگ کے نمائندگان، ڈسٹرکٹ و تحصیل خطیب سوات اور دیگر متعلقہ حکام بھی شریک ہوئے۔ڈپٹی کمشنر سوات نے متعلقہ محکموں کو ہدایت کی کہ باہمی رابطے اور مربوط حکمتِ عملی کے تحت انسدادِ ڈینگی سرگرمیوں کو مزید مؤثر بنایا جائے۔ انہوں نے تحصیل میونسپل ایڈمنسٹریشنز، لوکل گورنمنٹ، پبلک ہیلتھ انجینئرنگ اور واٹر اینڈ سینیٹیشن سروسز کمپنی سوات کو مچھر مار سپرے اور فومیگیشن سمیت ضروری انسدادی اقدامات یقینی بنانے کی ہدایت کی تاکہ ڈینگی مچھر کی افزائش اور بیماری کے پھیلاؤ کی بروقت روک تھام ممکن ہو سکے۔ڈپٹی کمشنر سوات نے کہا کہ ڈینگی کی روک تھام ایک مشترکہ سماجی ذمہ داری ہے، جس کے لیے متعلقہ اداروں کی مربوط کوششوں کے ساتھ عوامی تعاون بھی ضروری ہے۔ انہوں نے عوامی آگاہی مہم مزید مؤثر بنانے اور سکولوں، دیگر تعلیمی اداروں اور عوامی مقامات پر آگاہی سرگرمیوں کے انعقاد کی ہدایت کی، تاکہ شہریوں کو ڈینگی سے بچاؤ اور احتیاطی تدابیر کے بارے میں آگاہ کیا جا سکے۔انہوں نے تمام اسسٹنٹ کمشنرز کو ٹائر شاپس، بلاک فیکٹریوں، نرسری فارمز اور دیگر فیکٹریوں کے معائنے کرنے اور انسدادی اقدامات پر عمل درآمد یقینی بنانے کی ہدایت کی۔ محکمہ صحت کو ہدایت کی گئی کہ تمام ہسپتالوں میں ڈینگی کے مریضوں کے لیے مختص آئسولیشن وارڈز فعال رکھے جائیں، تاکہ کسی بھی ہنگامی صورتِ حال سے بروقت نمٹا جا سکے۔ڈپٹی کمشنر سوات سلیم جان مروت نے واضح کیا کہ عوام کی قیمتی جانوں کا تحفظ ضلعی انتظامیہ کی اولین ترجیح ہے۔ انہوں نے تمام متعلقہ محکموں کو اپنی ذمہ داریاں مؤثر انداز میں ادا کرنے کی ہدایت کرتے ہوئے کہا کہ انسدادِ ڈینگی اقدامات میں کسی قسم کی غفلت یا کوتاہی برداشت نہیں کی جائے گی۔
