سوات چیمبر کا سالانہ جنرل اجلاس، ٹیکس تحریک کو مزید منظم کرنے پر اتفاق

سوات (بیورورپورٹ) سوات چیمبر آف کامرس اینڈ انڈسٹری کا سالانہ جنرل اجلاس منعقد ہوا جس میں چیمبر کے نو منتخب ایگزیکٹیو ممبران، صنعت کاروں، تاجروں اور مختلف تاجر تنظیموں کے عہدیداران و مشران نے شرکت کی۔ اجلاس میں چیمبر کی کارکردگی، تاجروں اور صنعت کاروں کو درپیش مسائل، ملاکنڈ ڈویژن میں ٹیکس کے نفاذ کے خلاف جاری تحریک سمیت مختلف امور پر تفصیلی تبادلہ خیال کیا گیا۔ اجلاس سے ملاکنڈ ڈویژن ٹریڈرز فیڈریشن کے صدر عبدالرحیم، سوات چیمبر آف کامرس اینڈ انڈسٹری کے نو منتخب صدر یوسف علی خان، سابق صدر نور محمد خان، محبوب ہارون، حاجی زاہد خان، حاجی بخت کرم اور دیگر مقررین نے خطاب کیا۔ عبدالرحیم نے نو منتخب کابینہ کو مبارکباد دیتے ہوئے کہا کہ صنعت کاروں اور تاجروں کے مسائل کے حل اور ان کے حقوق کے تحفظ میں چیمبر آف کامرس کا کردار انتہائی اہم ہے، جبکہ ملاکنڈ ڈویژن میں ٹیکس کے نفاذ کے خلاف جاری تحریک میں سوات چیمبر نے ٹریڈرز فیڈریشن کے ساتھ مل کر بھرپور کردار ادا کیا ہے۔ انہوں نے کہا کہ احتجاجی تحریک کو مزید منظم اور مؤثر بنایا جائے گا، آئندہ ماہ صنعت کار، تاجر اور عوام یوٹیلٹی بلز جمع نہ کرنے کے اقدام پر غور کریں گے، جبکہ اس کے بعد موٹر وے کی بندش سمیت دیگر احتجاجی آپشنز بھی زیر غور لائے جائیں گے۔ نو منتخب صدر یوسف علی خان نے کہا کہ چیمبر سے وابستہ صنعت کاروں اور تاجروں کے مسائل کا حل ان کی اولین ترجیحات میں شامل ہے اور اس مقصد کے لیے تمام دستیاب وسائل بروئے کار لائے جائیں گے، جبکہ ٹیکس کے نفاذ کے خلاف جاری تحریک میں سوات چیمبر اپنا مؤثر کردار ادا کرے گا اور تاجروں و صنعت کاروں کے حقوق کے لیے بھرپور آواز اٹھائی جائے گی۔ سابق صدر نور محمد خان نے کہا کہ انہوں نے چیمبر کو فعال اور منظم بنانے کے لیے اپنی ذمہ داریاں بھرپور انداز میں ادا کیں اور بحیثیت صدر اپنے فرائض احسن طریقے سے نبھانے کی کوشش کی، جبکہ انہوں نے گزشتہ دور کی کارکردگی اور مالی معاملات کے ریکارڈ کی جانچ پڑتال کے لیے ارکان کی جانب سے تعاون کی ضرورت پر بھی زور دیا۔ اجلاس کے شرکاء نے سوات کی کاروباری و صنعتی برادری کو درپیش مسائل کے حل، چیمبر کو مزید فعال بنانے اور تاجروں کے حقوق کے تحفظ کے لیے مشترکہ کوششیں جاری رکھنے کے عزم کا اظہار کیا۔
۔۔۔۔۔