سوات: تحصیل بحرین میں شازیہ گمشدگی کیس، آٹھ ماہ بعد کھیتوں سے لاش برآمد، ساس، سسر اور دو دیور گرفتار

سوات (بیورورپورٹ)تحصیل بحرین کے علاقے بڈئی سیرئی میں شازیہ بی بی زوجہ کامران کو مبینہ طور پر آٹھ، نو ماہ قبل قتل کرکے لاش قریبی کھیتوں میں دفن کیے جانے کا انکشاف ہوا ہے۔ پولیس کے مطابق شازیہ بی بی کے بھائی حبیب الرحمٰن نے 21 اگست 2026 کو اپنی بہن کے لاپتہ ہونے کی رپورٹ تھانہ بحرین میں درج کرائی تھی، جس پر پولیس نے انکوائری شروع کی اور گزشتہ شب ایس ایچ او تھانہ بحرین اکبر حسین نے پولیس ٹیم کے ہمراہ کارروائی کرتے ہوئے شازیہ بی بی کی دفن شدہ لاش کی ہڈیاں گھر کے قریب کھیتوں سے برآمد کرلیں۔ پولیس نے لاش قانونی کارروائی اور پوسٹ مارٹم کے لیے سول ہسپتال مدین منتقل کردی۔ پولیس کے مطابق واقعے کے سلسلے میں شازیہ بی بی کے سسر خیراتی، ساس مسماۃبخمین اور دو دیور غفران اور گل محمد کو گرفتار کرلیا گیا ہے، جبکہ مقتولہ کا شوہر کامران اس وقت سعودی عرب میں موجود ہے جس کی گرفتاری عمل میں نہیں آسکی۔ پولیس نے واقعے کا مقدمہ تھانہ بحرین میں درج کرلیا ہے اور شوہر کامران کی گرفتاری کے لیے بھی قانونی کارروائی جاری ہے۔پولیس حکام کے مطابق قتل کے
محرکات جاننے کے لئے تحقیقات کی جارہی ہیں۔
۔۔۔۔۔