سوات: روښانہ سرسینئی جرگہ، امن و امان اور سماجی برائیوں کے خاتمے کیلئے 11 نکاتی فیصلوں کی منظوری

سوات (بیورو رپورٹ) تحصیل کبل کے علاقےسرسینئی میں عوام کے بہتر مستقبل، امن و امان اور سماجی برائیوں کے خاتمے کے لیے جرگے نے 11 نکاتی حتمی فیصلوں کی منظوری دے دی۔ نماز جمعہ کے بعد رحمانی مسجد میں مرکزی کمیٹی روښانہ سرسینئی کے زیر اہتمام جرگہ منعقد ہوا، جس میں پروفیسر اختر حسین، نادر خان، حاجی ہاشمی، سکندر شاہ، محمد رفیق، عبدالصبور، عادل محمد شاہ، ریاض احمد سمیت دیگر مشران، نوجوانوں اور مختلف مکاتب فکر کے افراد نے شرکت کی۔ جرگے میں منشیات فروشی، بدکاری اور چوری میں ملوث افراد کو پہلے نوٹس دینے، باز نہ آنے پر سوشل بائیکاٹ اور قانونی کارروائی کے لیے متعلقہ اداروں سے رجوع کرنے کا فیصلہ کیا گیا۔ جرائم پیشہ افراد کے سہولت کاروں اور پشت پناہی کرنے والوں کے خلاف بھی کارروائی کی جائے گی۔ کرایہ داروں کے لیے پولیس کلیئرنس اور کمیٹی کا این او سی لازمی قرار دیا گیا جبکہ غیر مقامی افراد کی سکروٹنی اور جرائم میں ملوث افراد کے خلاف کارروائی کا فیصلہ کیا گیا۔ گاؤں میں غیر مقامی پیشہ ور بھکاریوں کے داخلے، راستوں اور کھیتوں میں بھیڑ بکریوں کے ریوڑ لانے اور رات کے وقت مشکوک و مسلح افراد کی آمد پر پابندی ہوگی۔ موٹر سائیکل کی تیز رفتاری اور ون ویلنگ کی روک تھام کے ساتھ رات کو چہرہ چھپا کر موٹر سائیکل چلانے والوں سے تفتیش کی جائے گی۔ ہر گھر کے باہر روشنی اور صاحب حیثیت افراد کو سی سی ٹی وی کیمرے نصب کرنے کی ہدایت کی گئی۔
۔۔۔۔