ڈپٹی کمشنر دیر پائین کی زیرِ صدارت نومبر کی انسدادِ پولیو مہم کے حوالے سے ایریاز انچارجز کی خصوصی تربیتی نشست کا انعقاد

ضلعی انتظامیہ دیر پائین — 10 اکتوبر 2026

صوبائی حکومت کے احکامات کی روشنی میں ڈپٹی کمشنر دیر پائین جناب بشارت احمد کی زیرِ صدارت نومبر 2026 کی انسدادِ پولیو مہم کے سلسلے میں ایریاز انچارجز کی استعدادِ کار بڑھانے کے لیے ڈسٹرکٹ اسمبلی ہال بلامبٹ میں خصوصی تربیتی نشست کا انعقاد کیا گیا۔

تربیتی نشست میں ایڈیشنل ڈپٹی کمشنر ریلیف و انسانی حقوق جناب سید اکرم شاہ، ای پی آئی کوآرڈینیٹر، پی ای آئی کوآرڈینیٹر اور ضلعی دفترِ صحت کے پبلک ہیلتھ کوآرڈینیٹر سمیت متعلقہ افسران نے شرکت کی۔

ڈپٹی کمشنر کی ہدایات پر دیر پائین کے تمام ایریاز انچارجز کی پیشہ ورانہ صلاحیتوں میں اضافے اور پولیو مہم کے معیار کو بہتر بنانے کے لیے دو تربیتی نشستوں پر مشتمل پروگرام شروع کر دیا گیا ہے، جس میں پولیو ٹیموں کے طریقۂ کار، مائیکرو پلاننگ اور فیلڈ میں مؤثر نگرانی پر خصوصی توجہ دی جا رہی ہے۔

تربیتی نشست کے دوران شرکاء کو ویڈیوز، تصاویر اور دیگر تربیتی مواد کے ذریعے پولیو مائیکرو پلان، روڈ میپ، مہم کے مختلف مراحل اور ایریاز انچارجز کی ذمہ داریوں کے بارے میں تفصیلی بریفنگ دی گئی۔ اس تربیت کا بنیادی مقصد مہم کے دوران نگرانی کے نظام کو مؤثر بنانا، خامیوں کی نشاندہی کرکے انہیں دور کرنا، بین المہم سرگرمیوں کو بہتر بنانا اور ایک تربیت یافتہ و فعال ٹیم تیار کرنا ہے تاکہ انسدادِ پولیو مہم کے مطلوبہ اہداف حاصل کیے جا سکیں۔

اس موقع پر ڈپٹی کمشنر بشارت احمد نے ہدایت کی کہ تمام ایریاز انچارجز تربیتی نشستوں میں دی گئی ہدایات پر فیلڈ میں من و عن عمل درآمد یقینی بنائیں، کیونکہ ہدایات پر عمل درآمد میں غفلت مہم کے نتائج کو متاثر کر سکتی ہے۔ انہوں نے واضح کیا کہ تربیتی نشستوں کا مقصد ایریاز انچارجز کی صلاحیتوں میں اضافہ، عملی امور میں موجود خامیوں کو دور کرنا اور پولیو مہم کے معیار کو مزید بہتر بنانا ہے۔

ڈپٹی کمشنر نے مزید ہدایت کی کہ مہم کے دوران یونین کونسل منیجمنٹ افسران، ایریاز انچارجز، محکمہ صحت کے اہلکاروں اور دیگر متعلقہ شراکت داروں کے درمیان مؤثر رابطہ اور باہمی تعاون برقرار رکھا جائے۔ فیلڈ سے موصول ہونے والے مسائل کی بروقت نشاندہی اور فوری حل کو یقینی بنایا جائے تاکہ مہم کی سرگرمیاں کسی رکاوٹ کے بغیر جاری رہیں۔

انہوں نے کہا کہ بہترین کارکردگی کا مظاہرہ کرنے والے ایریاز انچارجز کی حوصلہ افزائی کے لیے انہیں تعریفی اسناد کے ساتھ نقد انعامات بھی دیے جائیں گے، جبکہ ذمہ داریوں میں غفلت اور تربیتی ہدایات پر عمل نہ کرنے کے معاملات کو سنجیدگی سے لیا جائے گا۔

ڈپٹی کمشنر بشارت احمد نے خود تربیتی نشستوں کی نگرانی کی۔ اس موقع پر انسدادِ پولیو سے متعلق سوالات و جوابات کی خصوصی نشست بھی منعقد ہوئی، جس میں شرکاء کے سوالات کے جوابات دیے گئے اور عملی امور سے متعلق رہنمائی فراہم کی گئی۔

ضلعی انتظامیہ اور محکمہ صحت دیر پائین نے اس عزم کا اعادہ کیا کہ نومبر 2026 کی انسدادِ پولیو مہم کو مؤثر، منظم اور کامیاب بنانے کے لیے تمام متعلقہ اداروں کے درمیان رابطے، تربیت اور فیلڈ نگرانی کو مزید بہتر بنایا جائے گا تاکہ پانچ سال سے کم عمر ہر بچے کو پولیو سے بچاؤ کے قطرے پلانے کے قومی مقصد کو یقینی بنایا جا سکے۔