سوات: تحصیل کبل میں عدالتی حکم پر عملدرآمد، قانونی دستاویزات اور این او سی نہ ہونے پر دو پیٹرول پمپس سیل

سوات (بیورو رپورٹ) اسسٹنٹ کمشنر کبل سید عمران علی شاہ نے کنزیومر پروٹیکشن کورٹ سوات کے فیصلے پر عملدرآمد کرتے ہوئے تحصیل کبل میں دو پیٹرول پمپس سیل کر دیے۔ سیل کیے گئے پیٹرول پمپس میں انصاف فلنگ اسٹیشن اور کاشف خان پیٹرولیم شامل ہیں۔ متعلقہ حکام کے مطابق مذکورہ پیٹرول پمپس مطلوبہ این او سی، قانونی دستاویزات اور ضروری منظوریوں کے بغیر کاروبار چلا رہے تھے، جس پر معزز عدالت کے فیصلے کی روشنی میں اسسٹنٹ کمشنر کبل نے کارروائی کرتے ہوئے دونوں پیٹرول پمپس کو سیل کر دیا۔