گبرال اتروڑ میں تین منزلہ ہوٹل میں ہولناک آتشزدگی، عمارت مکمل جل کر خاکستر
سوات (بیورو رپورٹ)وادی کالام کے سیاحتی علاقے گبرال اتروڑ میں اچانک لگنے والی شدید آگ نے تین منزلہ ہوٹل کو اپنی لپیٹ میں لے لیا، جس کے نتیجے میں پوری عمارت جل کر خاکستر ہوگئی اور ہوٹل مالکان کو بھاری مالی نقصان پہنچا۔ ابتدائی اطلاعات کے مطابق آگ اچانک بھڑک اٹھی اور دیکھتے ہی دیکھتے شدت اختیار کرگئی، جس نے تین منزلہ ہوٹل کو اپنی لپیٹ میں لے لیا۔ آگ اس قدر شدید تھی کہ عمارت مکمل طور پر جل گئی، تاہم آتشزدگی کی وجوہات تاحال معلوم نہیں ہوسکیں۔ واقعے کے بعد متاثرہ افراد کو شدید مالی مشکلات کا سامنا ہے، جبکہ علاقے میں اس واقعے پر تشویش پائی جاتی ہے۔ متاثرین نے حکومت خیبرپختونخوا، ضلعی انتظامیہ اور متعلقہ اداروں سے اپیل کی ہے کہ واقعے کا فوری نوٹس لیا جائے، آتشزدگی کی وجوہات معلوم کرنے کے لیے تحقیقات کرائی جائیں اور نقصانات کا تخمینہ لگاکر متاثرہ ہوٹل مالکان کو فوری مالی امداد فراہم کی جائے تاکہ وہ اپنے کاروبار کو دوبارہ بحال کرسکیں۔
۔۔۔۔